ឆេះផ្ទះមួយខ្នងស្លាប់មនុស្ស២នាក់សង្ស័យជាករណីឃាតកម្ម
បាត់ដំបង៖ យ៉ាងហោចណាស់មនុស្ស២នាក់បានស្លាប់បាត់បង់ជីវិតយ៉ាងអាណោចអធម៌នៅក្នុងភ្នក់ភ្លើង បន្ទាប់ពីអគ្គីភ័យឆាបឆេះផ្ទះប្រជាពលរដ្ឋមួយខ្នង ៖ ហេតុការណ៍គួរឲ្យរន្ធត់នេះបានកើតឡើងកាលពីវេលាម៉ោង០១និង៤០នាទីរំលងអាធ្រត្រឈានចូលថ្ងៃទី៣១ ខែឧសភាឆ្នាំ២០២០ នៅក្រុមទី១២ ភូមិបន្សាយត្រែង ឃុំបន្សាយត្រែង ស្រុកថ្មគោល ខេត្តបាត់ដំបង ។
សមត្ថកិច្ចបានអោយដឹងថា សពជនរងគ្រោះទី០១-ឈ្មោះ គិម ធឿន ស្រី អាយុ៥២ ឆ្នាំនិងទី០២-ឈ្មោះ គិម សៀវម៉ី ភេទស្រី អាយុ១៨ឆ្នាំ សពជនរងគ្រោះទាំងពីរនាក់ជាម្ដាយនិងកូន ត្រូវភ្លើងឆេះមើលលែងស្គាល់។ ចំណែកម្ចាស់ផ្ទះឈ្មោះ យៃ ឡើយ ភេទប្រុសអាយុ៥២ឆ្នាំ ដែលត្រូវជាប្ដី និងឪពុក ជនរងគ្រោះខណៈអគ្គីភ័យកំពុងឆាបឆេះ មិនឃើញនៅកន្លែងកើតហេតុនោះទេ ។
សមត្ថកិច្ចបានបន្តថា ពេលអគ្គិភ័យកំពុងឆាបឆេះយ៉ាងសន្ធោរសន្ធៅ ត្រូវបានអ្នកភូមិផ្តល់ព័ត៌មានដល់សមត្ថកិច្ចនគរបាលនៃអធិការដ្ឋាននគរបាលស្រុកថ្មគោល ភ្លាមៗរថយន្តពន្លត់អគ្គិភ័យរបស់នគរបាលបានចេញមកជួយអន្តរាគមន៍បាញ់ពន្លត់ជាបន្ទាន់ក្រោមការដឹកនាំរបស់ លោកវរសេនីយ៍ឯក ផង់ សុភាព អធិការនគរបាលស្រុកថ្មគោល ដោយប្រើប្រាស់រថយន្តពន្លត់អគ្គីភ័យចំនួន០១គ្រឿងបាញ់ទឹកអស់មួយឡានទើបរលត់ទាំងស្រុង។
សមត្ថកិច្ចបានអោយដឹងទៀតថា ក្នុងហេតុការណ៍គ្រោះអគ្គិភ័យនេះដែលសមត្ថកិច្ចបានដាក់ការស័ង្សយថា ជាករណីឃាតកម្មហើយសមត្ថកិច្ចជំនាញកំពុងស្រាវជ្រាវយ៉ាងយកចិត្តទុកដាក់បំផុត ។
ចំពោះការខូចខាតរួមមាន៖ ឆេះផ្ទះ០១ខ្នងទំហំ ១០ម៉ែត្រx៥ម៉ែត្រ ធ្វើអំពីឈើ ប្រក់ស័ង្កសី ជញ្ជាំងស័ង្កសី ខូចខាត៧០% ព្រមទាំងខូចខាតម៉ូតូចំនួន០២គ្រឿងទាំងស្រុងនិងខូចខាតកង់ចំនួន០១គ្រឿងទាំងស្រុង និងសម្ភារមួយចំនួនទៀត ។
បច្ចុប្បន្ន សមត្ថកិច្ចជំនាញកំពុងតែស្វែងរកឈ្មោះ យៃ ឡើយ ដែលត្រូវជាប្តីនិងជាឳពុកដែលបាត់ខ្លួនពីមូលដ្ឋាន ហើយក៏ជាមនុស្សដែលស្ថិតក្នុងការស័ង្សយចំពោះករណីខាងលើនេះ ៕
