ជិះម៉ូតូបំណងទៅដេកផ្ទះបងប្រុសត្រូវរថយន្តបុកពីក្រោយដួលបោកក្បាលស្លាប់
ភ្នំពេញ៖ បុរសម្នាក់ជិះម៉ូតូបំណងទៅដេកនៅផ្ទះបង តែជា អកុសលជិះមកដល់ពាក់កណ្ដាលផ្លូវត្រូវរថយន្ត បុកដួលបោកក្បាលនិងថ្នល់ស្លាប់ ភ្លាមៗនៅនិងកន្លែង បង្កការភ្ញាក់ផ្អើលកាលពីវេលាម៉ោង១០ និង១៥នាទីយប់ ថ្ងៃទី១៤ ខែសីហា ឆ្នាំ២០១៩ នៅតាមបណ្ដោយផ្លូវជាតិលេខ២ ភូមិក្រាំងស្វាយសង្កាត់ព្រែកកំពឹស ខណ្ឌដង្កោ ។
សពជនរងគ្រោះមានឈ្មោះ ប៉ែន តុលាអាយុ ២៥ឆ្នាំ មុខរបរ ជាងប៉ះកង់ឡាន ស្នាក់នៅសង្កាត់ព្រែកហូរ ក្រុងតាខ្មៅ ខេត្តកណ្ដាល និងមានស្រុកកំណេីត ភូមិពភ្លា ឃុំសង្ឃ័រ ស្រុកស្វាយរៀង ខេត្តស្វាយរៀង ។
យោងតាមប្រភពព័ត៌មានពីប្រជាពលរដ្ឋដែលនៅកន្លែងកើតហេតុបានឲ្យដឹងថា មុនកើតហេតុ គេឃើញបុរសរងគ្រោះជិះម៉ូតូម៉ាកហុងដាកុបជ្រុង ពណ៌ទឹកប៊ិច ពាក់ស្លាកលេខ ស្វាយរៀង 1F-1790 ធ្វើដំណើរតាមបណ្ដោយផ្លូវជាតិលេខ២ ទិសដៅពីកើតទៅលិច ក្នុងល្បឿនល្មម ខណៈមកដល់ចំណុចកើតហេតុ ស្រាប់តែមានរថយន្តបង្កម៉ាក ហុីយ៉ាន់ដាយ ប្រភេទដឹកទូកុងតឺន័រ ពណ៌ស ពាក់ស្លាកលេខភ្នំពេញ3E-0247 ធ្វើដំណើរបញ្ច្រាស់ទិសគ្នាក្នុងល្បឿនយ៉ាងលឿន និងបានវ៉ាជែងរថយន្តមួយគ្រឿងផ្សេងទៀត មិនប្រយត្ន័ជ្រុលទៅបុកម៉ូតូកុបជ្រុងចំពីមុខពេញទំហឹង បណ្ដាលឲ្យបុរសម្ចាស់ម៉ូតូដួលបោកក្បាលនិងថ្នល់ស្លាប់ក្នុងថ្លុកឈាមយ៉ាងអាណោចអធម៌ ចំណែកឯតៃកុងរថយន្តបង្កបានចុះគេចខ្លួនបាត់។
-បើតាមសម្ដីបងប្រុសបង្កើតរបស់សពជនរងគ្រោះបានឲ្យដឹងថា ជនរងគ្រោះបានជិះម៉ូតូពីព្រែកហូរ មកផ្ទះគាត់នៅម្ដុំរង្វង់មូលគួរស្រូវ ដើម្បីមកដេកជាមួយ តែអកុសលប្អូនប្រុសរបស់គាត់បានជួបគ្រោះថ្នាក់ចរាចរណ៍ស្លាប់បាត់បង់ជីវិតគួរឲ្យសោកស្ដាយបំផុត ។
ក្រោយកើតហេតុសមត្ថកិច្ចមូលដ្ឋាននិងជំនាញចរាចរណ៍ខណ្ឌដង្កោ ធ្វើការវាស់វែងយករថយន្តបង្ក និងម៉ូតូរងគ្រោះទៅរក្សាទុកនៅការិយាល័យចរាចរណ៍រាជធានីភ្នំពេញ រង់ចាំដោះស្រាយតាមច្បាប់។ ចំណែកសពជនរងគ្រោះសមត្ថកិច្ចធ្វើកំណត់ហេតុប្រគល់ឲ្យសាច់ញាតិដឹកយកទៅស្រុកកំណើតធ្វើបុណ្យតាមប្រពៃណី ៕
