ឃាត់ខ្លួនជនសង្ស័យ៥នាក់ថ្នាំញៀនជិត៣គីឡូនិងកាំភ្លើង១ដើម រំដោះជនជាតិថៃ២នាក់
ព្រះវិហារ៖ កម្លាំងសមត្ថកិច្ចខេត្តព្រះវិហា បើកប្រតិបត្តិការឡោមពទ្ឋ័ បង្ក្រាបករណីចាប់ជំរិតទារប្រាក់នឹងជួញដូរថ្នាំញៀនឃាត់ខ្លួនជនសង្ស័យបានចំនួន៥នាក់ដកហូតថ្នាំញៀន ជិត៣គីឡូក្រាម អាវុធAKបត់១ដើមគ្រាប់៣០គ្រាប់ និងបានរំដោះ ជនរងគ្រោះជនជាតិថៃ២នាក់ ដែលក្រុមជនសង្ស័យចាប់ជំរិតទាប្រាក់
ប្រតិបត្តិការនេះបានធ្វើឡើងនៅព្រឹកថ្ងៃទី២៥ខែធ្នូឆ្នាំ២០១៨ នៅភូមិស្រអែមជើង ឃុំស្រអែម ស្រុកជាំក្សាន្ត ខេត្តព្រះវិហារ ។
លោកស្នងការនគរបាលខេត្តព្រះវិហា បានឲ្យដឹងថា កាលពីថ្ងៃទី២៣ ខែធ្នូ ឆ្នាំ២០១៨ ស្ត្រីរងគ្រោះជាជនជាតិថៃ២នាក់ បានធ្វើដំណើរតាមយន្តហោះ ពីទីក្រុងបាងកក មកចុះនៅព្រលានយន្តហោះខេត្តសៀមរាប ហើយក៏មានរ៉ឺម៉កកង់បីដឹកចេញពីព្រលាន ដែលមានរថយន្តមួយគ្រឿង ចាំទទួលយកមកទីតាំងកើតហេតុនៅស្រុកជាំក្សាន្ត ខេត្តព្រះវិហារ ។ ក្រោយមកក្រុមជនសង្ស័យទាំង៥នាក់នេះ បានបង្ខំឲ្យស្ត្រីរងគ្រោះជាជនជាតិថៃទាំង២នាក់ទូរស័ព្ទទៅក្រុមគ្រួសារនៅប្រទេសថៃ ឲ្យផ្ទេរប្រាក់ជាថ្នូរ នឹងការដោះលែង ។ បន្ទាប់ពីស្ត្រីជនជាតិថៃទាំងពីរនេះ ប្រាប់ក្រុមគ្រួសារ និងផ្ញើរូបភាពទៅឲ្យក្រុមគ្រួសារមើល ក្រុមគ្រួសាររងគ្រោះក៏ប្តឹង មកស្ថានទូតថៃប្រចាំកម្ពុជា ហើយស្ថានទូតថៃប្តឹងបន្តមកអគ្គស្នងការនគរបាលជាតិ ទើបបំបែកបានសំណុំរឿងនេះ។
លោកស្នងការបានបន្តថា កម្លាំងសមត្ថកិច្ចប្រមាណជា៤០នាក់បានសហការជាមួយកម្លាំងនគរបាល នៃនាយកដ្ឋានសន្តិសុខផ្ទៃក្នុងបានចុះទៅដល់ទីតាំងខាងលើ និងឡោមព័ទ្ធទីតាំងមួយយប់ទល់ភ្លឺទើបបង្ក្រាបបានជោគជ័យដោយឃាត់ខ្លួនជនសង្ស័យ៥នាក់ ព្រមទាំងដកហូតវត្ថុតាងមួយចំនួននិងរំដោះនារីជនជាតិថៃបានដោយសុវត្ថិភាព។
បច្ចុប្បន្នជនសង្ស័យទាំង៥នាក់ រួមនឹងវត្ថុតាងមានថ្នាំញៀនជិត៣គីឡូក្រាម អាវុធAKបត់១ដើម គ្រាប់៣០គ្រាប់ រថយន្ត ម៉ូតូ សម្ភារផ្សេងទៀត ត្រូវបានបញ្ជូនទៅកាន់រាជធានីភ្នំពេញ ដើម្បីចាត់ការបន្តទៅតាមច្បាប់ ៕
