រថយន្តក្រុមហ៊ុនវីរៈប៊ុនថា បើកលឿនបែកកង់រេចង្កូតបុករនាំងដែកព្រលាន យន្តហោះពោធិ៍ចិនតុង ក្រឡាប់រងការខូចខាត យ៉ាងដំណំ
ភ្នំពេញ៖ រថយន្តកូរ៉េ ៤តោនកន្លះដឹកបញ្ញើគ្រប់ខេត្តក្រុងរបស់ក្រុមហ៊ុនវីរៈ ប៊ុនថាំ បានបើកបែកកង់រេចង្កូតបុករនាំងដែកព្រលាន យន្តហោះពោធិ៍ចិនតុងក្រឡាប់ផ្ងាជើងខូចខាតយ៉ាងដំណំ
ហេតុការណ៍នេះកើតឡើងកាលពីវេលាម៉ោង ៥ព្រឹកទី ១៣ខែធ្នូឆ្នាំ ២០២០នៅចំណុចផ្លូវសហព័ន្ធរុស្សីក្នុងភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានី ភ្នំពេញ។
បើតាមសាក្សីដែលឃើញហេតុការណ៍បាន ប្រាប់ឲ្យដឹងថាដំបូងឡើយគេឃើញរថយន្តកូរ៉េរបស់ក្រុមហ៊ុន វីរៈប៊ុនថាំ ពណ៌ស ពាក់ស្លាកលេខ ភ្នំពេញ3E-6539បើកបរដោយបុរសម្នាក់បាន បើកតាមបណ្ដោយផ្លូវសហព័ន្ធរុស្ស៊ី ទិសដៅពីលិចមកកើតយ៉ាងលឿន ខណៈមកដល់ចំណុចកើតហេតុខាងលើក៏ស្រាប់តែបែកកង់រេចង្កូតមកស្ដាំដៃជ្រុលទៅបុកជាមួយនឹងរនាំងដែកព្រលានយន្តហោះបាក់បែកអស់ជាច្រើនផ្ទាំងហើយរថយន្តក៏ក្រឡាប់សង្កត់ លើរនាំងដែករបងព្រលានយន្តហោះ បណ្តាលឲ្យដាច់កង់ខាងមុខចេញពីរថយន្តអស់២កង់។រថយន្ដរងការខូចខាតយ៉ាងដំណំតែមិនបណ្ដាលឲ្យនរណា ម្នាក់រងរបួសនោះទេ។ ចំពោះអ្នកបើកបររថយន្តបង្ករងរបួសតិចតួចស្រាល ហើយក៏បានខលហៅតំណាងក្រុមហ៊ុនយករថយន្ត មកសាងអីវ៉ាន់ចេញពីកន្លែងកើតហេតុ។
ក្រោយមកសមត្ថកិច្ចមូលដ្ឋាននិងសមត្ថកិច្ចជំនាញចរាចរណ៍ក្រុងមកវាស់វែងស្ទូចយករថយន្តបង្កទៅរក្សាទុករង់ចាំដោះស្រាយនៅពេលក្រោយ៕
