សម្ដីខ្លាំងម្លេះចែ! ស្ត្រីសង្ស័យស្រវឹងជោគជាំបើករថយន្តបង្កគ្រោះថ្នាក់ចរាចរណ៍ ពេលអ្នកសារព័ត៌មានទៅថតឡាយ ដេញចាប់ទូរសព្ទ័ និងប្រើស្ដីមិនសមរម្យ
ភ្នំពេញ ៖ ស្ត្រីសម្ដីខ្លាំងម្នាក់រួមដំណើរនឹងបុរសម្នាក់ទៀត សង្ស័យស្រវឹងស្រាខ្លាំងបើករថយន្តស៊េរីទំនើប មិនប្រកាន់ស្ដាំជ្រុលទៅប៉ះរថយន្តឡិចស៊ីស មួយគ្រឿងទៀតបណ្ដាលឲ្យដាច់កង់មុខខាងឆ្វេងទៅមុខលែងរួច ។ លុះពេលអ្នកសារព័ត៌មាន ជាច្រើនអង្គភាពចុះកយព័ត៌មាន ឡាយផ្ទាល់បែរជាស្ត្រីខាងលើដេញចាប់ទូរស័ព្ទអ្នកសារព័ត៌មាន រត់ចែកជើងគ្នា ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង១២ និង២០នាទី រំលងអធ្រាត្រឈានចូលអង្គាទី២០ខែតុលាឆ្នាំ២០២០ នៅចំណុចមុខ ភោជនីយដ្ឋាន(តាយ តាយ២) តាមបណ្ដោយផ្លូវ ១៩៨៦ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញរថយន្តម៉ាកហ្វតរ៉េនជ័រ មួយគ្រឿងពណ៌ស ពាក់ស្លាកលេខ ភ្នំពេញ2BH-6799 បើកបរដោយស្ត្រីម្នាក់និងរួមដំណើរជាមួយបុរសម្នាក់ទៀត ធ្វើដំណើរតាមបណ្តោយផ្លូវ១៩៨៦ទិសដៅពីលិចទៅកើត ខណៈមកដល់ចំណុចកើតហេតុបានរេចង្កូតមកខាងឆ្វេងដៃចូលកន្លងផ្លូវម្ខាងទៀតជ្រុលទៅប៉ះរថយន្តលុចស៊ីសRX330 ពណ៌ស ពាក់ផ្លាកលេខ ភ្នំពេញ2AJ-0882បើកបរដោយបុរសម្នាក់រួមដំណើរនិងស្រ្តីម្នាក់ទៀតធ្វើដំណើរតាមបណ្តោយផ្លូវ១៩៨៦បញ្ច្រាស់ទិសដៅគ្នាពីកើតទៅលិច បុកចំកង់ខាងមុខផ្នែកខាងឆ្វេងបណ្ដាលឲ្យរថយន្តលិចស៊ីសដាច់កាឡេកង់ខាងមុខ ចំណែករថយន្តបង្កមិនទាន់អស់ល្បឿនបានជ្រុលទៅមុខ ប្រមាណជា៥០ ម៉ែត្រដាច់ក្រឡេកង់ខាងមុខដូចគ្នាទៅលែងរួច ។
ប្រភពបានបន្តទៀតថា ភ្លាមៗស្រាប់តែមានក្រុមអ្នកសារព័ត៌មាន ជាច្រើនអង្គភាពបានចុះមកដល់កន្លែងកើតហេតុ និងធ្វើការឡាយផ្ទាល់ ស្រាប់តែស្ត្រីសម្ដីខ្លាំងខាងភាគីរថយន្តបង្កចេញមកដេញចាប់ទូរស័ព្ទអ្នកសារព័ត៌មានកុំឲ្យឡាយ ហើយបានប្រាប់ទៅអ្នកសារព័ត៌មានថា កុំឲ្យឡាយថារូបគេជាអ្នកខុស ឲ្យឡាយនិយាយថាត្រូវ បើមិនថាត្រូវទេ រូបគេនិងប្តឹងអ្នកសារព័ត៌មាន ហើយអ្នកសាព័ត៌មាន ក៏មិនហ៊ានតបវែងឆ្ងាយទៅលើស្ត្រីរូបនោះដែរ ដោយមិនតបត ខ្លាចទាស់ទែងពាក្យសម្តីគ្នានាំឲ្យមានរឿងវែងឆ្ងាយ បានត្រឹមតែរត់ចែកជើងគ្នាកាត់ភ្លៀង។
ក្រោយពេលកើតហេតុភាគីទាំងពីរ បាន សម្របសម្រួលគ្នាអស់រយៈពេលជិត១ម៉ោង នៅតែមិនត្រូវគ្នា លុះសមត្ថកិច្ចមូលដ្ឋានបានចុះមកដល់ឲ្យភាគីទាំងពីរ សម្របសម្រួលគ្នាបន្តទៀត ដោយភាគីខាងរថយន្តបង្កបានចេញសំណងចំនួន៨០ដុល្លារទៅឲ្យភាគីខាងរងគ្រោះដោយភាគីរងគ្រោះមិនចង់មានរឿងវែងឆ្ងាយក៏ព្រមទទួលយកសំណងចំនួន( ៨០ ដុល្លារ ) ដើម្បីបញ្ចប់រឿងនៅនឹងកន្លែងកើតហេតុ៕
