ចាញ់បោកសម្ដីតារត់ម៉ូតូឌុប នាំចូលផ្ទះសំណាក់ លង់ខ្លួនអស់ប្រាណ នាងឈឺចិត្តទាញកាំបិតកាប់ រងរបួសធ្ងន់
ភ្នំពេញ៖ បុរសវ័យចំណាស់ម្នាក់បានរងរបួសធ្ងន់បង្កឲ្យភ្ញាក់ផ្អើលពេញផ្ទះសំណាក់( រស្មីជម្ពូវ័ន ) ទាំងព្រឹក ខណៈក្មេងស្រីម្នាក់កាប់ជាច្រើនកាំបិតបុ័ងតោ ដោយចោទប្រកាន់ថា បុរសរូបនោះលួងលោមហើយចាប់រំលោភនាង ៖ ហេតុការណ៍នេះបានបង្កឲ្យមានការភ្ញាក់ផ្អើលកាលពីវេលាម៉ោង០៨ព្រឹកថ្ងៃទី០១ ខែមិថុនា ឆ្នាំ២០២០ នៅក្នុងផ្ទះសំណាក់ យីហោ ( រស្មីជម្ពូវ័ន ) ភូមិព្រៃព្រីងជើង២ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
-បុរសដែលត្រូវរបួសមានឈ្មោះ រស់ ផាត អាយុ ៥៨ឆ្នាំ មុខរបររត់ម៉ូតូឌុប ស្នាក់នៅផ្ទះជួលភូមិចម្ការឪឡឹក សង្កាត់កាកាប២ ខណ្ឌពោធិ៍សែនជ័យ មានស្រុកកំណើត ភូមិដក់ពរ ឃុំបឹងត្រាញ់ខាងត្បូង ស្រុកត្រាំកក់ ខេត្តតាកែវ រងរបួសចំនួន៨កាំបិត។
-ចំណែកខាងក្មេងស្រី ឈ្មោះ ណាង ស្រីនី អាយុទើប១៥ឆ្នាំ មកទីភ្នំពេញទើបបាន ២ថ្ងៃ ដើម្បីរកការងារធ្វើតែមិនទាន់បាន មានទីលំនៅ ភូមិជំនាប់ ឃុំសង្កែទប ស្រុកឱរ៉ាល់ ខេត្តកំពង់ស្ពឺ ។
ភាគីខាងបុរសបានឲ្យដឹងថា មុនកើតហេតុ គាត់រត់ម៉ូតូឌុប ជួបក្មេងស្រីខាងលើ នៅឈរក្បែរវត្តតាំងកសាងខាងត្បូង មានបង្វិចមួយគាត់បានឈប់ម៉ូតូហៅសាកសួរ ទៅណាមកណា នាងប្រាប់ថា ដើររកការងារធ្វើមិនទាន់អត់លុយជិះទេ លឺដូច្នេះ គាត់ថាបើអត់លុយទៅធ្វើសរសៃឲ្យពូ ចាំពូឲ្យលុយ២០ដុល្លារ ព្រមព្រៀងគ្នាហើយ គាត់បានឌុបនាងមកចូលផ្ទះសំណាក់ ខាងលើ មិនទាន់ធ្វើអ្វីផង ត្រូវបាននាងកាប់តែម្តង ។
ឯភាគីខាងក្មេងស្រីបានឲ្យដឹងថា មុនពេលកើតហេតុ ខណ:ដែលនាងកំពុងឈរម្នាក់ឯង ក្បែរវត្តតាំកសាង ស្រាប់តែបុរសវ៏យចំណាស់ខាងលើជិះម៉ូតូម៉ាកហុងដា សេ១២៥ ស៊េរី២០១៥ ពណ៌ខ្មៅ ពាក់ផ្លាកលេខ តាកែវ 1L-7045 មកដល់ឈប់សួរហៅឌុប តែនាងប្រាប់ថា អត់លុយជិះទេ ម្យ៉ាងកំពុងដើររកការងារធ្វើមិនទាន់បានផង ពេលនោះបុរសវ័យចំណាស់ក៏ប្រាប់ថា មិនអីទេ ចាំគាត់ជួយរកការងារឲ្យធ្វើ ហើយគាត់ធានាថានឹងជួយរក បើអត់លុយអញ្ចឹងទៅជាមួយគាត់ធ្វើសរសៃឲ្យគាត់ ចាំគាត់ឲ្យលុយ២០ដុល្លារ នាងនឹកគិតថា ការងារនឹងបានធ្វើដោយស្រួល ហើយ បុរសខាងលើ ក៏បានឌុបនាងមកចូលផ្ទះសំណាក់ (រស្មីជម្ពូវ័ន ) តែមិនធ្វើសរសៃបែរជាមកចាប់នាងសម្រាត ខោអាវ រំលោភម្តងហើយម្តងទៀតបានសម្រេចចំនួន២ដង ធ្វើឲ្យនាងឈឺចិត្តខឹងពេក ទាញបានកាំបិតបុ័ងតោ ពីកាបូប ដែលនាងយកមកពីផ្ទះបំណងចង់ធ្វើជាចុងភៅ កាប់ទៅលើបុរសនោះតែម្តង ហើយបានស្រែកឲ្យម្ចាស់ផ្ទះជួយ បង្កការភ្ញាក់ផ្អើល ដល់សមត្ថកិច្ចចុះទៅឃាត់នាំនាងចូលប៉ុស្តិ៍ ។
ទោះជាយ៉ាងណាបុរសចំណាស់រូបនោះមិនទាន់ដឹងថា ជាជនរងគ្រោះឬយ៉ាងណានៅឡើយទេ តែក្នុងសភាពរងរបួសធ្ងន់ ត្រូវបានសមត្ថកិច្ចហៅរថយន្តសង្គ្រោះរបស់អង្គភាព៧១១ កងពលតូចលេខ៧០ ដឹកបញ្ជូនទៅមន្ទីរពេទ្យព្រះកុសុម: ។ ចំណែកឯក្មេងស្រី ក៏មិនទាន់ដឹងថា ជាជនល្មើសឬយ៉ាងណាដែរ ក្រោយកើតហេតុ សមត្ថកិច្ច បានឃាតនាំទៅសាកសួរនៅប៉ុស្តិ៍ចោមចៅ៣ ។
ជុំវិញករណីហឹង្សាបង្កឲ្យរបួសស្នាម ខាងលើ នេះនៅមិនទាន់ដឹងថា ខាងណាខុស ខាងណាត្រូវនៅឡើយទេ សមត្ថកិច្ចកំពុង តែ សាកសួរនិងពិនិត្យ រងចាំជំនាញធ្វើការកោសល្យវិច័យ លើក្មេងស្រី ថាតើត្រូវបានបុរសខាងលើរំលោភពិតប្រាកដមែនឬអត់ ៕
