ខ្លាំងមែន!! ម្ចាស់ទីតាំងហ្គេមត្រីភូមិលូសង្កាត់ស្វាយប៉ាកនិយាយអួតថា អាជ្ញាធរមានសមត្ថកិច្ចខណ្ឌឫស្សីកែវមិនហ៊ានចាប់ហ្គេមរបស់គេនោះទេ
ភ្នំពេញ៖ ទីតាំងល្បែងសុីសងខុសច្បាប់ហ្គេមបាញ់ត្រីនៅភូមិលូ សង្កាត់ស្វាយប៉ាក ខណ្ឌ ឫស្សីកែវ នៅតែបន្តបើកលេងទទួលក្រុមក្មេងទំនើងញៀនល្បែងបានយ៉ាងរលូនដដែលគ្រាន់តែលុប យីហោ លេខ៣៤ចេញ តែប៉ុណ្ណោះ បើទោះបីជាក្រុមអ្នកសារព័ត៌មាន បានចេញផ្សាយ និងរាយការណ៍ជួនអាជ្ញាធរមានសមត្ថកិច្ចខណ្ឌឫស្សីកែវ យ៉ាងណាក៏ដោយ ប៉ុន្តែ អាជ្ញាធរមានសមត្ថកិច្ច ហាក់មិនមានវិធានការទប់ស្កាត់ឬ បង្ក្រាបឡើយ ។
យោងតាមប្រភពពីប្រជាពលរដ្ឋដែលរស់នៅក្បែទីតាំងបនល្បែងហ្គេមបាញ់ត្រីខាងបានប្រាប់ឲ្យដឹងថា ទីតាំងនៅម្ដុំនេះគឺប្រមូលផ្ដុំទៅដោយក្រុមក្មេងស្ទាវចេញចូលពពាក់ ពពួន សង្ស័យផ្ដុំគ្នាប្រើប្រាស់នូវគ្រឿងញៀនទៀតផង ។ ប្រភពបន្តថា ជារាងរាល់ថ្ងៃជាពិសេស ពេលយប់ តែងតែ បង្កភាពអសន្តិសុខនៅក្នុងមូលដ្ឋានដែលគាត់រស់នៅហើយ តែមិនដែលឃើញអាជ្ញាធរមានសមត្ថកិច្ចចុះមកបង្ក្រាបឡើយ ។
បើយោងតាមប្រភពច្បាស់ការណ៍ផ្សេងមួយទៀតបានឲ្យដឹងថា ម្ចាស់ទីតាំងបនល្បែងបាញ់ត្រី មួយនេះពិតជាខ្លាំង បាននិយាយថា ខ្លួនមិនខ្លាចនិងអ្នកការសែតផ្សាយនោះទេ ចង់ផ្សាយអីផ្សាយទៅអាជ្ញាធរមានសមត្ថកិច្ច មិនហ៊ានចាប់របស់គេនោះទេ ។ ប្រភពបន្តថា ម្ចាស់ហ្គេមបាញ់ត្រី នេះបានអួត អាងថាគេនិយាយ ត្រូវគ្នាអស់ហើយ ។
ប្រជាពលរដ្ឋរងចាំមើលតើ អាជ្ញាធរមានសមត្ថកិច្ច ខណ្ឌឫស្សីកែវ ហ៊ានបង្ក្រាបទីតាំងហ្គេមទាំងនោះដែរទេ ឬ ក៏មិនដូចម្ចាស់ហ្គេមបានអះអាងមែន ៕
