សិស្សវិទ្យាល័យកោះកុង រិះគន់អ្នកគ្រួបង្រៀនម្នាក់លក់វិញ្ញាសារថ្លៃកប់ពពក
កោះកុង ៖ សិស្សសាលាវិទ្យាល័យកោះកុង ជាច្រើនកំពុងផ្ទុះការរិះគន់យ៉ាងខ្លាំង ចំពោះអ្នកគ្រូបង្រៀនម្នាក់ ដែលជាគ្រូបង្រៀនមុខវិទ្យា ពលរដ្ឋ និង សីលធម៌ ក្រោយការលក់វិញ្ញាសារក្នុង១សន្លឹកតម្លៃដល់ទៅ១ម៉ឺនរៀល ហើយបើសិនជាសិស្សណាទៅយកដល់ផ្ទះអ្នកគ្រូគឺ១សន្លឹកតម្លៃ៥ពាន់រៀល ។
បើតាមការលើកឡើងពីសិស្សវិទ្យាល័យកោះកុងបានឲ្យដឹងថា អ្នកគ្រូខាងលើមានឈ្មោះ លឹម សុវណ្ណនី ជាគ្រូបង្រៀនថ្នាក់ទី៧A និងត្រូវជាខ្សែខាងប្រធានមន្ទីរអប់រំខេត្តកោះកុងផង ហេតុនេះហើយ ទើបបានជាអ្នកគ្រូហ៊ានលក់វិញ្ញាសារថ្លៃកប់ពពកបែបនេះ ដែលជាហេតុធ្វើអោយសិស្សក្រីក្រជាច្រើននាក់ពុំមានលទ្ធភាពក្នុងការទិញវិញ្ញាសារមុខវិទ្យាពលរដ្ឋ និងសីលធម៌របស់អ្នកគ្រូនោះទេ ចំពោះអ្នកដែលហ៊ានទិញនោះគឺសុទ្ធតែទិញដោយការបង្ខំចិត្តតែប៉ុណ្ណោះ ។
រឿងរ៉ាវមួយនេះក៏បានផ្ទុះមតិរិះគន់ជាច្រើនពីសំណាក់មហាជនថា បើសិនជាគ្មានការឃុបឃិតបើកដៃពីនាយកសាលា និង ខាងមន្ទីរអប់រំទេនោះ អ្នកគ្រូរូបនេះគឺពិតជាមិនហ៊ានដល់ថ្នាក់នេះនោះទេ ហេតុនេះហើយរឿងរ៉ាវមួយនេះត្រូវតែខាងនាយកសាលាវិទ្យាល័យ និង ប្រធានមន្ទីរអប់រំ ទទួលខុសត្រូវនិងបកស្រាយអោយបានច្បាស់លាស់ ដើម្បីអោយខាងអាណាព្យាបាលរបស់សិស្សទាំងអស់មានទំនុកចិត្តលើវិស័យអប់រំ ជាពិសេសអាណាព្យាបាលរបស់សិស្សក្រីក្រ បើមិនដូច្នោះទេ វាពិតជាធ្វើអោយសិស្សក្រីក្រមួយចំនួនប្រឈមនូវការបាត់បង់ការសិក្សាដោយសារតែ គ្រួសារពួកគាត់ពុំមានលទ្ធភាពក្នុងការទិញវិញ្ញាសាររបស់គ្រូៗ ។
ជុំវិញការចោទប្រកាន់ខាងលើ ភ្នាក់ងារយើងនៅពុំទាន់អាចទំនាក់ទំនងសុំការបំភ្លឺពីអ្នកគ្រូ លឹម សុវណ្ណនីបានទេនៅព្រឹកថ្ងៃទី២៤ខែធ្នូឆ្នាំ២០១៨ ព្រោះតេសព្ទ័មិនចូល ហើយចំពោះលោក ម៉ែន ស៊ីថាត នាយកសាលាវិទ្យាល័យកោះកុងវិញ ភ្នាក់ងារយើងបានទៅដល់សាលាវិទ្យាល័យកោះកុងដើម្បីទំនាក់ទំនងសុំការបំភ្លឺ ដែរ តែលោកគ្រូហាក់ដូចជាមានការគេចវេសពុំចង់បកស្រាយអំពីបញ្ហាមួយនេះទាល់តែសោះ ។
ដោយឡែកលោក ង៉ែត ឡឹង ប្រធានមន្ទីរអប់រំ យុវជន និងកីឡាខេត្តកោះកុង បានថ្លែងអោយដឹងថា ចំពោះរឿងរ៉ាវទាំងនេះ លោកបានអោយខាងប្រធានការិយាល័យអប់រំក្រុង និងខាងនាយកសាលាវិទ្យាល័យកោះកុង ហៅខាងអ្នកគ្រូ លឹម សុវណ្ណនី និង សិស្សនោះមកជួបគ្នាដើម្បីជជែករកសាច់រឿងពិត ហើយចំពោះលោកក៏កំពុងតែរងចាំរបាយការណ៍ពីខាងការិយាល័យក្រុងនិងនាយកសាលាដែរ ទើបលោកអាចរកវិធានការដោះស្រាយបាន ហើយបើសិនជារកឃើញថារឿងនេះជាការពិតមែននោះ ខាងលោកនិងចាត់វិធានការតាមច្បាប់របស់មន្ទីរ តែបើសិនជារឿងរ៉ាវមួយនេះវាមានសភាពធ្ងន់ធ្ងរខ្លាំងលោកអាចនិងបញ្ចប់ក្របខ័ណ្ឌរបស់អ្នកគ្រូនោះផងដែរ ៕
