សមត្ថកិច្ចកំពុងស្រាវជ្រាវរកម្ចាស់សំឡេងដែលផ្សព្វផ្សាយមិនពិតថា អាជ្ញាធរនឹងបិទរាជធានីភ្នំពេញ
ភ្នំពេញ ៖ អ្នកនាំពាក្យសាលារាជធានីភ្នំពេញ បានចេញមុខមកច្រានចោលភ្លាមៗ នូវការផ្សព្វផ្សាយព័ត៌មានក្លែងក្លាយតាមបណ្ដាញ Facebook ដែលផ្សព្វផ្សាយថា អាជ្ញាធរនឹងបិទរាជធានីភ្នំពេញ ដើម្បីបង្ការ និងការពារការរីករាលដាលជំងឺកូវីដ១៩។
លោក ម៉េត មាសភក្តី អ្នកនាំពាក្យសាលារាជធានីភ្នំពេញបានចេញមុខច្រានចោលព័ត៌មានប្រឌិតនោះក្រោយមានការចែកចាយសំឡេងមួយ ដែលត្រូវបានគេផ្ញើតៗគ្នាតាមបណ្តាញសង្គម ដោយប្រាប់ថា អាជ្ញាធរគ្រោងបិទរាជធានីភ្នំពេញ ។ ប៉ុន្តែអ្នកនាំពាក្យថា នោះជាព័ត៌មានក្លែងក្លាយ ហើយបានអំពាវនាវដល់បងប្អូនប្រជាពលរដ្ឋកុំជឿ និងកុំ forward សារសំឡេងនេះបន្តទៀត នាំឲ្យមានការយល់ច្រឡំ។
អ្នកនាំពាក្យសាលារាជធានីភ្នំពេញក៏បានបញ្ជាក់បន្ថែមដែរថា អាជ្ញាធរកំពុងស្រាវជ្រាវស្វែងរកម្ចាស់សំឡេង ដែលថតជាសារនេះ ដើម្បីចាត់វិធានការតាមច្បាប់។ បន្ថែមលើនេះ លោកបានអំពាវនាវដល់ប្រជាពលរដ្ឋឱ្យជួយផ្ដល់ព័ត៌មាន ដើម្បីឈានទៅរកម្ចាស់សំឡេងនោះ ដោយអាជ្ញាធរនឹងមានរង្វាន់លើកទឹកចិត្ត៕
