ចោរឆក់២នាក់ត្រូវជាប់ខ្នោះ បន្ទាប់ពីឆក់កាបូបជនបរទេសជិះPassAppតែមិនបានសម្រេច
ភ្នំពេញ ៖ ស្ត្រី២នាក់ម្នាក់ជាជនជាតិបរទេស ម្នាក់ជនជាតិខ្មែរ បានរងរបួសធ្ងន់ បន្ទាប់ពីជនសង្ស័យ២នាក់ជិះម៉ូតូឌុបគ្នាមកធ្វើសកម្មភាពឆក់កាបូប មិនបានសម្រេចបណ្ដាលឲ្យក្រឡាប់រុឺម៉ក ហើយភ្លាមៗត្រូវបានកម្លាំងនគរបាលនៃអធិការដ្ឋាននគរបាលខណ្ឌបឹងកេងកង សហការណ៍ជាមួយកម្លាំងការិយាល័យព្រហ្មទណ្ឌកម្រិតស្រាលក្រសួងមហាផ្ទៃឃាត់ខ្លួនបានភ្លាមៗ
ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង០៩ និង១៥នាទីយប់ ថ្ងៃទី៣០ ខែមករាឆ្នាំ២០២០ នៅតាមបណ្ដោយផ្លូវម៉ៅសេទុង ក្នុងសង្កាត់ទួលស្វាយព្រៃ១ ខណ្ឌបឹងកេងកង រាជធានីភ្នំពេញ ។
សមត្ថកិច្ចបានឲ្យដឹងថា ជនសង្ស័យទាំង២នាក់ដែលធ្វើសកម្មភាពឆក់កាបូប ហើយត្រូវឃាត់ខ្លួនរួមមាន៖ ទី១/ឈ្មោះ ជា ដេវិត ប្រុសអាយុ១៩ឆ្នាំ និងទី២/ឈ្មោះ ម៉ង់ ចាប៉ង់ ប្រុសអាយុ២០ឆ្នាំ ។ ចំណែកវត្ថុតាងចាប់យកម៉ូតូមួយគ្រឿងម៉ាកស៊ុយសុគីនិច ពណ៌ស ពាក់ស្លាកលេខ1HZ5210(ជាមធ្យោបាយជិះធ្វើសកម្មភាព) រីឯជនរងគ្រោះពុំទាន់ស្គាល់ឈ្មោះនោះទេ ។
សមត្ថកិច្ចបានឲ្យដឹងទៀតថា មុនកើតហេតុជនរងគ្រោះទាំង៤នាក់រួមមានកូនក្មេងម្នាក់ បានជិះម៉ូតូកង់បី(PassApp)តាមបណ្ដោយផ្លូវម៉ៅសេទុង ទិសដៅពីកើតមកលិចខណៈមកដល់ចំណុចកើតហេតុខាងលើស្រាប់តែមាន ជនសង្ស័យពីរនាក់ជិះម៉ូតូមួយគ្រឿងម៉ាកស៊ុយសុគី និច ពណ៌ស មកអែបម៉ូតូកង់បីហើយក៏ធ្វើសកម្មភាពឆក់កាបូបពីស្ត្រីជនជាតិបរទេស តែនៅពេលនោះត្រូវបានជនរងគ្រោះចាប់ទាញមកវិញបណ្តាលឲ្យក្រឡាប់កង់បី សង្កត់ពីលើជនរងគ្រោះរងបួសធ្ងន់២នាក់ និងស្រាល២នាក់ ហើយស្របពេលនោះក៏មានកម្លាំងល្បាតរបស់ការិយាល័យព្រហ្មទណ្ឌក្រសួងមហាផ្ទៃនៅក្បែរ ក៏បានឃាត់ខ្លួនជនសង្ស័យបានទាំងពីរនាក់រួមទាំងមធ្យោបាយធ្វើសកម្មភាព។
បច្ចុប្បន្ន ជនសង្ស័យទាំងពីរនាក់រួមទាំងវត្ថុតាងត្រូវបានបញ្ជូនទៅខាងការិយាល័យព្រហ្មទណ្ឌកម្រិតស្រាល (នាយកដ្ឋាន)ក្រសួងមហាផ្ទៃ ដើម្បីសាកសួរនឹងកសាងសំណុំរឿងចាត់ការតាមផ្លូវច្បាប់៕
