ប្រើល្បិចជួលឡានជិះពីខេត្តបាត់ដំបង យកមកប្លន់នៅខណ្ឌពោធិសែនជ័យ
ភ្នំពេញ៖ ជនសង្ស័យម្នាក់បានជួលរថយន្តបុរសម្នាក់ឲ្យដឹកខ្លួនពីខេត្តបាត់ដំបងមកភ្នំពេញចំនួន៣ថ្ងៃ ខណៈមកដល់ភ្នំពេញទើបបានមួយថ្ងៃក៏ធ្វើសកម្មភាពរឹតកនិងវាយទៅជនរងគ្រោះបំណងប្លន់យករថយន្តតែមិនបានសម្រេច ឆ្លៀតយកទូរសព្ទ័ជនរងគ្រោះបានមួយគ្រឿងរួចរត់គេចខ្លួនបាត់ស្រមោល
ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង០១និង៤៥នាទីរំលងអាធ្រាត ឈានចូលថ្ងៃទី២៦ខែធ្នូឆ្នាំ២០១៩ នៅចំណុចមុខអាកាសយានដ្ឋានអន្តរជាតិភ្នំពេញ តាមបណ្ដោយផ្លូវសហព័ន្ធរុស្ស៊ី ក្នុងសង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ។ ជនរងគ្រោះមានឈ្មោះ មុំ សាន ភេទប្រុស អាយុ៤៥ឆ្នាំ ស្នាក់ផ្ទះលេល២១៥ ក្រុម១០ ភូមិដូនទាវ សង្កាត់ពាមឯក ស្រុកបាភ្នំ ខេត្តបាត់ដំបង។
បើតាមសម្ដីជនរងគ្រោះបានរៀបរាបឲ្យដឹងថា នៅវេលាម៉ោង ៣ និង ៤០នាទីរសៀលថ្ងៃទី២៥ខែធ្នូឆ្នាំ២០១៩ ជនសង្ស័យបានតេទូរសព្ទ័ទៅគាត់ដោយប្រាប់ថា សុំជួលរថយន្តគាត់ចំនួន៣ថ្ងៃហើយក្នុងមួយថ្ងៃគេឲ្យតម្លៃ ៨០ដុល្លារឲ្យដឹកមកភ្នំពេញ បន្ទាប់តេចរចាគ្នាតាមទូរសព្ទ័ត្រូវរ៉ូវ រួចមក ជនសង្ស័យឲ្យរូបគាត់ទៅយករូបគេនៅចំណុចមុខអធិការដ្ឋាននគរបាលស្រុកសង្កែ។
ជនរងគ្រោះបានបន្តថា បន្ទាប់ពីជនសង្ស័យណាត់ឲ្យទៅយករួចមក រូបគាត់បានបើករថយន្តមួយគ្រឿងម៉ាកសាំយ៉ុង ពណ៌ស ពាក់ស្លាកលេខបាត់ដំបង2A-7909ទៅដឹកជនសង្ស័យនៅកន្លែងណាត់ពីខេត្តបាត់ដំបងមកភ្នំពេញ លុះបើកពីខេត្តបាត់ដំបងមកដល់ចំណុចកើតហេតុ ជនសង្ស័យបានប្រាប់រូបគាត់ថាឈប់រថយន្តនៅទីនេះហើយរូបគេចូលទៅយកភ្ញៀវម្នាក់ទៀតចេញពីអាកាសយានដ្ឋានអន្តរជាតិភ្នំពេញ មួយសន្ទុះក្រោយមកក៍ឃើញជនសង្ស័យដើរចេញមកវិញតែម្នាក់ឯងដោយប្រាប់រូបគាត់ថាខុសជើងហោះហើរ រួចជនសង្ស័យក៏បានដើរចូលក្នុងរថយន្ដរបស់គាត់វិញអង្គុយធ្វើដូចជាមិនមានរឿងអ្វី ខណៈនោះរូបគាត់ក៏មិនចាប់អារម្មណ៍អ្វីដែរ បានអង្គុយនៅផ្នែកខាងមុខ ដោយដាក់ដៃគងនិងចង្កូតរថយន្តហើយសំងំដេកមួយភាំង ស្រាប់តែជនសង្ស័យយកខ្សែលួសចងរុំជាមួយឈើដែលជនសង្ស័យលាក់ទុកជាប់និងខ្លួនមករឹតកគាត់ពីក្រោយជាប់ ភ្លាមៗនោះរូបគាត់ក៏បានដឹងខ្លួនរួចខំប្រឹងរើបំរះ និងបានតដៃជាមួយជនសង្ស័យមួយប្រាវហើយជនសង្ស័យក៏បានយកឈើដែលរុំជាមួយនិងលួស មកវាយទៅលើមុខរបស់គាត់បណ្ដាលឱ្យប៉ោងមុខប៉ោងមាត់រងរបួសយ៉ាងដំណំ។ ពេលនោះគាត់ក៏បានស្រែកឆោឡោធ្វើឲ្យជនសង្ស័យភ័យស្លន់ស្លោរឆ្លៀតយកទូរសព្ទរូបគាត់មួយគ្រឿងម៉ាកOPPO F5 រត់គេចខ្លួនបាត់ស្រមោល។
ស្របពេលនោះដែរ ប្រជាពលរដ្ឋក៏បានរិះគន់ចំៗទៅលើ លោកយឹម សារ៉ាន់ ដែលជាអធិការ នគរបាល ខណ្ឌពោធិសែនជ័យ ថាសង្ស័យមិនដឹកនាំ កូនចៅល្បាតទើប មានករណី វាយប្លន់ជាញឹកញាប់នៅក្នុងទឹកខណ្ឌពោធិសែនជ័យ មិនថាយប់ឬក៏ថ្ងៃនោះទេ ។ ក្រោយកើតហេតុ សមត្ថកិច្ចមូលដ្ឋានបានត្រឹមតែចុះទៅមើលកន្លែងកើតហេតុនិងបាននាំជនរងគ្រោះទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលកាកាបទី២ តែប៉ុណ្ណោះ៕
