មានវិប្បត្តិគ្រួសារគិតខ្លីប្រល័យជីវិតលោតទឹកសម្លាប់ខ្លួនពីលើស្ពានច្បារអំពៅ
ភ្នំពេញ៖ យុវជនម្នាក់មានទំនាស់នៅក្នុងក្រុមគ្រួសារគិតខ្លីដើរមកលើស្ពានព្រះមនីវង្ស(ច្បារអំពៅ ) រួចលោតទឹកសម្លាប់ខ្លួនបាត់ស្រមោល
ហេតុការណ៍នេះបានបង្កឲ្យមានការភ្ញាក់ផ្អើលដល់បងប្អូនប្រជាពលរដ្ឋយ៉ាងខ្លាំងនាំគ្នាមកចោមរោមមើល កាលពីវេលាម៉ោង០៧និង ២០នាទីយប់ថ្ងៃទី២៣ខែធ្នូ ឆ្នាំ២០១៩ នៅចំណុចលើស្ពានព្រះមនីវង្ស ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
ជនរងគ្រោះដែលលោតទឹកសម្លាប់ខ្លួនមានឈ្មោះ ថាង វ៉េងហាន ភេទប្រុស អាយុ១៦ឆ្នាំ ស្នាក់នៅផ្ទះលេខ១៣៨ ផ្លូវបេតុង ខាងក្រោយវត្តនិរោធ ក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ។
បើតាមសម្ដីស្ត្រីម្នាក់ឈ្មោះ ងៀង ធីង៉ុកហុីវ ជនជាតិវៀតណាម អាយុ៤៣ឆ្នាំ និងត្រូវជាម្ដាយ បង្កើតជនរងគ្រោះបានប្រាប់ឲ្យដឹងថា មុនពេលកើតហេតុ យុវជនរងគ្រោះបានទាស់សម្ដីគ្នាជាមួយបងប្អូននៅក្នុងគ្រួសារ ហើយមិនមែនតែលើកទី១នោះទេ ទើបកូនគាត់តូចចិត្តគិតខ្លីសម្រេចដើរមកលោតទឹកពីលើស្ពានព្រះមនីវង្សសម្លាប់ខ្លួនតែម្ដង ។
ក្រោយពេលកើតហេតុភ្លាមៗ សមត្ថកិច្ចមូលដ្ឋានបានចុះទៅដល់ដែរ តែមិនអាចជួយរកជនរងគ្រោះឃើញឡើង ដោយបានត្រឹមតែនាំម្ដាយជនរងគ្រោះទៅកាន់ប៉ុស្ដិ៍នគរបាលរដ្ឋបាល ទន្លេបាសាក់ ដើម្បី សួរនាំ និងធ្វើកំណត់ហេតុតែប៉ុណ្ណោះ ៕
