ជនសង្ស័យ២នាក់(លួចហែកហ្វេស ប៊ុកផ្ញើសារ ឆបោកប្រាក់តាមវីង)ត្រូវសមត្ថកិច្ចចាប់វាយខ្នោះ
បាត់ដំបង៖ កម្លាំងនគរបាលព្រហ្មទណ្ឌកំរិតស្រាល នៃស្នងការដ្ឋាននគរបាលខេត្តបាត់ដំបង ដឹកនាំដោយលោកវរសេនីយ៍ទោ ឈឿង គឹមសុង ប្រធានការិយាល័យនគរបាលព្រហ្មទណ្ឌកំរិតស្រាល ខេត្ត សហការជាមួយកម្លាំងនគរបាលព្រហ្មទណ្ឌកំរិតធ្ងន់នៃស្នងការដ្ឋាននគរបាល ខេត្តកែប ដែលដឹកនាំដោយលោកវរសេនីយ៍ទោ កើតដាវុធ បានបើកប្រតិបត្តិការ បង្ក្រាបករណី ឆបោក (លួចបន្លំគណនីហ្វេសប៊ុករួចផ្ញើសារឲ្យផ្ញើប្រាក់តាមភ្នាក់ងារផ្ទេរប្រាក់វីង)
ប្រតិបត្តិការណ៍បង្ក្រាបនេះបានធ្វើឡើងកាលពីវេលាម៉ោង០៥និង៤៥នាទីល្ងាចថ្ងៃទី២០ ខែធ្នូ ឆ្នាំ២០១៩ នៅចំណុចលើផ្លូវបេតុង ស្ថិតក្នុងភូមិឡឥដ្ឋ សង្កាត់ព្រែកព្រះស្ដេច ក្រុង និងខេត្តបាត់ដំបង ដោយឃាត់ខ្លួនជនសង្ស័យបានជាបន្តបន្ទាប់ចំនួន២នាក់។
សមត្ថកិច្ចបានអោយដឹងថា ក្នុងកិច្ចប្រតិបត្តិការនេះកម្លាំងសមត្ថកិច្ច ឃាត់ខ្លួនជនសង្ស័យបានម្នាក់មានឈ្មោះ សេង ភារ៉ាហៅពេទ្យ ភេទប្រុស អាយុ២៩ឆ្នាំ មានទីលំនៅភូមិឈើទាល ឃុំឈើទាល ស្រុកបាណន់ខេត្តបាត់ដំបង រួចហើយបាននាំយកមកកាន់ស្នងការដ្ឋានធ្វើការសាកសួររួច បន្ទាប់មកក៏បានបន្តទៅឃាត់ខ្លួនជនសង្ស័យម្នាក់ទៀត មានឈ្មោះ ឈុន ពិសិដ្ឋ ភេទប្រុស អាយុ ២៨ឆ្នាំ មានទីលំនៅភូមិចំការសំរោង២ សង្កាត់ចំការសំរោង ក្រុងបាត់ដំបងខេត្តបាត់ដំបង ។
សមត្ថកិច្ចបានបញ្ជាក់ថា កាលពីថ្ងៃទី១៨ខែធ្នូឆ្នាំ២០១៩ ជនសង្ស័យឈ្មោះ ឈុន ពិសិទ្ធ បានធ្វើសកម្មភាពលួចបន្លំគណនីហ្វេសប៊ុករបស់ប្រជាពលរដ្ឋនៅក្នុងខេត្តកែបចំនួន៣គណនីផ្សេងគ្នា ក្រោយពីជនសង្ស័យបានធ្វើការហែកប្រព័ន្ធហ្វេសប៊ុក ហើយបានផ្ញើសារថាជាភ្នាក់ងារវីងវេលុយចំនួន៩៥០០ដុល្លារ និងប្រាក់ខ្មែរចំនួន ៤លានរៀល តាមរយៈលេខទូរសព្ទចំនួន៦លេខផ្សេងគ្នាក្រោយពីជនសង្ស័យបានផ្ញើសារឲ្យវេប្រាក់រួចជនសង្ស័យក៏បានផ្ញើលេខកូដឱ្យទៅឈ្មោះ សេង ភារ៉ា ហៅពេទ្យ ជាអ្នកទៅដកប្រាក់នៅក្នុងខេត្តបាត់ដំបង។
បន្ទាប់ពីឃាត់ខ្លួនសមត្ថកិច្ចបានដកហូតវត្ថុតាងដកហូតរួមមាន៖-ទូរស័ព្ទដៃចំនួន៣គ្រឿង-ស៊ីមទូរសព្ទចំនួន៨- ម៉ូតូមួយគ្រឿងម៉ាកហុងដា pcx ពណ៌ស បិតស្គុតពណ៌ខ្មៅ គ្មានស្លាកលេខ-ប្រាក់ខ្មែរចំនួន៤៣ម៉ឺនរៀល ។
បច្ចុប្បន្ន នគរបាលការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តបាត់ដំបងបានធ្វើកំណត់ហេតុប្រគល់ជនសង្ស័យរួមទាំងវត្ថុតាងឱ្យទៅកម្លាំងការិយាល័យនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តកែបចាត់ការតាមនីតិវិធីនៃច្បាប់៕
