បើកម៉ូតូកង់បីលឿន មិនប្រយត្ន័គេចពីរថយន្តជ្រុលទៅបុករបាំងថ្ម ក្រឡាប់ របួសធ្ងន់
ភ្នំពេញ៖ បុរសម្នាក់បើកម៉ូតូកង់បីឥណ្ឌាក្នុងល្បឿនលឿនមិនប្រយត្ន័ គេចពីរថយន្តបត់ឆ្លងផ្លូវជ្រុលទៅរបាំងថ្មចែកទ្រូងផ្លូវក្រឡាប់រងរបួសធ្ងន់បែកប្រអប់ជើង
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៧និង៥០នាទីព្រឹកថ្ងៃទិ១៨ខែតុលាឆ្នាំ២០១៩ នៅតាមបណ្ដោយផ្លូវ សហព័ន្ធរុស្សី ភូមិព្រៃជីសាក់ សង្កាត់ចោមចៅ៣ ខណ្ឌពោធិសែនជ័យ ។
បើតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញម៉ូតូកង់បីឥណ្ឌាមួយគ្រឿងពណ៌ស ពាក់ស្លាកលេខកំពង់ចាម1U-4920 មានដឹកក្រណាត់ បើកបរដោយបុរសម្នាក់ ធ្វើដំណើរតាមបណ្ដោយផ្លូវសហព័ន្ធរុស្សី ទិសដៅពីលិចទៅកើត ក្នុងល្បឿនយ៉ាងលឿនមិនបានប្រុងប្រយត្ន័ ខណៈមកដល់ចំណុចកើតហេតុ ស្រាប់តែមានរថយន្តធន់ធំមួយគ្រឿងដែលធ្វើដំណើរស្របទិសគ្នានៅខាងមុខបានបត់ឆ្វេងឆ្លងផ្លូវ ធ្វើអោយអ្នកបើកម៉ូតូកង់បីវាក់អឺ គេចពីរថយន្តជ្រុលទៅបុករបាំងថ្មពុះចែកទ្រូងផ្លូវក្រឡាប់ផ្ងាជើងបណ្ដាលឲ្យបុរសជាអ្នកបើកកង់បីរងរបួសធ្ងន់បែកប្រអប់ជើងខាងស្ដាំ បន្ទាប់មកត្រូវបានសាច់ញាតិមកដឹកយកទៅព្យាបាលនៅមន្ទីរពេទ្យ ។ ចំណែករបាំងថ្មរងការខូចខាតបន្តិចបន្តួច ។
ក្រោយពេលកើតហេតុ សមត្ថកិច្ចមូលដ្ឋានបានទៅដល់ធ្វើកំណត់ហេតុយកម៉ូតូកង់បីឥណ្ឌាទៅរក្សាទុកនៅប៉ុស្តិ៍នគរបាលចោមចៅ៣រងចាំដោះស្រាយពេលក្រោយ ៕
