ហួសចិត្ត! ជនជាតិចិន បើករថយន្តបង្កគ្រោះថ្នាក់ចរាចរណ៍បន្តិចបន្តួច បក្ខពួកមកវាយជនរងគ្រោះបន្ថែមទៀត
ភ្នំពេញ៖ ស្ត្រីជនជាតិចិនម្នាក់បើករថយន្តបត់ឆ្វេងមិនប្រយ័ត្នជ្រុលទៅបុកម៉ូតូមួួគ្រឿងជិះដោយបុរសម្នាក់បណ្តាលឲ្យរងរបួសស្រាលបន្ទាប់មកក៍មានបុរសជនជាតិចិនម្នាក់ជាបក្ខពួកដើរចេញពីក្នុងមកវាយជនរងគ្រោះបន្តែមទៀត បង្កការភ្ញាក់ផ្អើលដល់សមត្ថកិច្ចចុះមកអន្តរាគមន៍
ហេតុការណ៍នេះបានកើតឡើងកាលពីវេលាម៉ោង០៨ និង៣០នាទីយប់ថ្ងៃទី០១ខែតុលាឆ្នាំ២០១៩ នៅតាមបណ្តោយផ្លូវព្រះមុុន្នីវង្ស សង្កាត់ទន្លេបាសាក់ ខណ្ឌចំការមន។
បើតាមប្រភពព័ត៌មានពីកន្លែងកើតហេតុបានឲ្យដឹងថា ដំបូង គេឃើញរថយន្តមួយគ្រឿងម៉ាក ហាយលែនឌ័រពណ៌ខ្មៅពាក់ស្លាកលេខCD-17-022 បើកបរដោយស្ត្រីជនជាតិចិន ធ្វើដំណើរតាមបណ្ដោយផ្លូវព្រះមុុន្នីវង្សទិសដៅពីជើងទៅត្បូង លុះមកចំណុចកើតហេតុ បានបត់ឆ្វេង បំណងចូលក្នុងអគ្គកុងសុលតែមិនប្រយ័ត្នជ្រុលចង្កូតទៅបុកម៉ូតូមួយគ្រឿងម៉ាកBELLYពណ៌សលាយខ្មៅស្លាកលេខកណ្តាល1AA-0047 ជិះដោយបុរសម្នាក់បញ្ច្រាស់ទិសគ្នាធ្វើឲ្យខ្ទាតទៅប៉ះនិងទ្រូងផ្លូវរងរបួសស្រាល ភ្លាមៗនោះក៍មានបុរសជនជាតិម្នាក់ដែលជាបក្ខពួកខាងរថយន្តបង្កបានដើរចេញពីក្នុង រួចមកវាយចំគំត្រចៀងរបស់អ្នកជិះម៉ូតូបណ្ដាលឲ្យរបួសបន្ថែមទៀត រួចបុរសជនជាតិចិន នោះបានដើរចូលក្នុងបាត់ធ្វើប្រងើយនៅតែស្ត្រីអ្នកបើករថយន្តធ្វើឲ្យផ្អើលឆោឡោ ។
ក្រោយកើតហេតុសមត្ថកិច្ចចុះមកអន្តរាគមន៍ឲ្យភាគីទាំងសងខាងធ្វើការសម្របសម្រួលគ្នា បន្ទាប់មកខាងភាគីរថយន្តបង្កបានឲ្យជនរងគ្រោះចូលទៅខាងក្នុងធ្វើការចរចារគ្នាដើម្បីបញ្ចប់រឿងនៅនិងកន្លែងកើតហេតុ៕
