ជនសង្ស័យជាង១០នាក់ដេញកាប់យុវជនមួយក្រុម៧នាក់ និងផ្ទុះអាវុធមួយគ្រាប់នៅផ្លូវថៃហ្គ័រ បំណងប្លន់យកម៉ូតូតែមិនបានសម្រេច
ភ្នំពេញ ៖ មានយុវជនម្នាក់ក្នុងចំណោមមិត្តភ័ក្ត៦ទៅ៧នាក់ បានរបួសក្បាលត្រូវបញ្ចូនទៅមន្ទីពេទ្យ ខណៈពួកគេជិះម៉ូតូឌុបគ្នាជូនមិត្តភ័ក្តទៅផ្ទះក៏ជួបក្រុមជនសង្ស័យមានគ្នាប្រមាណជាង១០នាក់ជិះម៉ូតូដេញកាប់ ព្រមទាំងផ្ទុះអាវុធមួយគ្រាប់ កាលពីវេលាម៉ោង១១ និង៣០នាទីយប់ ថ្ងៃពុធ ទី២៣ ខែកញ្ញា ឆ្នាំ២០២០ នៅចំណុចមុខស្ថានីយ៍ទូរទស្សន៍ ហង្សមាស តាមបណ្ដោយផ្លូវថៃហ្គ័រ ក្នុងសង្កាត់ព្រែកឯង ខណ្ឌ ច្បារអំពៅ រាជធានីភ្នំពេញ ។
បេីតាមសម្ដីយុវជនរងគ្រោះ២ទៅ៣នាក់ដែលស្ថិតក្នុងសភាពរឿងហេតុខាងលេីសុំមិនបញ្ចេញឈ្មោះបានប្រាប់អ្នកសារព័ត៌មានឲ្យដឹងថា ពួកគេមានគ្នាប្រមាណ៧នាក់ បានជិះម៉ូតូ៣គ្រឿងឌុបគ្នាចេញពីស្ពានព្រែកសំរោងនិងឆ្លងកាត់ផ្លូវថៃហ្គ័រដេីម្បីជូនមិត្តភ័ក្តទៅផ្ទះ ខណៈជិះមកដល់កន្លែង កេីតហេតុ ស្រាប់តែមានជនសង្ស័យមួយក្រុមមានគ្នាប្រមាណជាង១០នាក់ជិះម៉ូតូជាច្រេីនគ្រឿងចេញពីផ្លូវលំមួយ ប្រដាប់ដោយដាវ កាំបិតស្ទេីគ្រប់ដៃ ព្រមទាំងកាំភ្លេីងខ្លី ដេញតាមពីក្រោយរួចធ្វេីសកម្មភាពកាប់ទៅលេីជនរងគ្រោះ និងមានផ្ទុះអាវុធមួយគ្រាប់ ធ្វេីឲ្យជនរងគ្រោះម្នាក់រយៈក្បាលហូរឈាម និងមានអ្នកខ្លះផ្ដួលម៉ូតូរត់ចូលព្រៃ អ្នកខ្លះជិះម៉ូតូរត់យករួចខ្លួន ។
ប្រភពដដែលបានបន្តថា ក្រោយពីជនរងគ្រោះផ្ដួលម៉ូតូរត់ចូលព្រៃ ក្រុមជនសង្ស័យក៏បានមកលេីកម៉ូតូជនរងគ្រោះបំរុងជិះយកទៅដែរ តែយកមិនកេីត ព្រោះម៉ូតូជាប់ហ្វ្រាំង មិនទៅមុខ ទេីបពួកគេនាំគ្នាជិះម៉ូតូគេចខ្លួនបាត់អស់ ។
ក្រោយកេីតហេតុរយះពេលជិតមួយម៉ោង ទេីបសមត្ថកិច្ចមូលដ្ឋានចុះមកដល់និងសួរនាំរឿងហេតុ មួយសន្ទុះ ទេីបសម្រេចចិត្តនាំយុវជនរងគ្រោះទៅកាន់នគរបាលប៉ុស្ដិ៍រដ្ឋបាល ព្រែកឯង ដេីម្បីសួរនាំបន្ត និងធ្វេីពាក្យបណ្ដឹងផងដែរ ៕
