អាណិតណាស់ ! ក្មេងប្រុសអាយុ៥ឆ្នាំម្នាក់ត្រូវភ្លើងឆេះខ្លោចនិង៣នាក់ទៀតរបួសធ្ងន់និងស្រាលករណីឆេះផ្ទះនៅក្បែរផ្សារកអណ្ដើក
ព្រៃវែង៖ អាសូរណាស់! ក្មេងប្រុសម្នាក់ត្រូវបានភ្លើងឆេះខ្លោចនៅក្នុងភ្នក់ភ្លើងស្លាប់យ៉ាងអាណោចអធម៌ និង៣នាក់ទៀតរងរបួសធ្ងន់ស្រាលនៅ ក្នុងហេតុការណ៍គ្រោះអគ្គីភ័យឆេះផ្ទះប្រជាពលរដ្ឋជាជាងធ្វើម៉ូតូ
ហេតុការណ៍គ្រោះអគ្គីភ័យនេះបានកើតឡើងនៅវេលាម៉ោង១២និង៤៥នាទីរសៀលថ្ងៃទី០២ខែមិនាឆ្នាំ២០២០ នៅចំណុចក្បែរផ្សារកអណ្ដើក ភូមិចំបក់ ឃុំប្រាសាទ ស្រុកកំពង់ត្របែកខេត្តព្រៃវែង ។
សមត្ថកិច្ចបានអោយដឹងថា ម្ចាស់ផ្ទះរងគ្រោះមានឈ្មោះ ឈួ ស្រ៊ុន ភេទប្រុស អាយុ៤៧ឆ្នាំ មានទីលំនៅកន្លែងកើតហេតុ។
ចំណែកក្មេងប្រុសដែលស្លាប់មានឈ្មោះឈួ ម៉េងជឺ ភេទប្រុស អាយុ៥ឆ្នាំ និង៣នាក់ទៀតរងរបួសធ្ងន់និងស្រាល។
សមត្ថកិច្ចបានបញ្ជាក់ថា មូលហេតុបណ្តាលមកពីម្ចាស់ផ្ទះធ្វើម៉ូតូរោទិ៍ទៅបែកផ្កាភ្លើងប៉ះនិងដបសាំងធ្វើអោយឆាបឆេះបង្កជាអណ្តាតភ្លើងតែម្តង ។
ចំណែកទំហំនៃការខូចខាតសមត្ថកិច្ចនៅមិនទាន់សន្និដ្ឋានបាននៅឡើងទេ ៕
