មេឈ្មួញដឹកឈើចូលទៅលក់នៅវៀតណាម សារឿន ម៉ាប់ ជាអ្នកណាទើបបានសមត្ថកិច្ចពាក់ពន្ធ័មិនហ៊ាបបង្ក្រាប
ខេត្តមណ្ឌលគិរី៖ យោងតាមប្រភពលួចខ្សឹបប្រាប់ថាលោក សារឿន ម៉ាប់ មានខ្សែក្រាស់ៗ នឹងមានទំនាក់ទំនង ជាមួយអ្នកមានអំណាចនៅក្នុងតំបន់ប៊ូស្រាយ៉ាងស្និតស្នាលដូចស្រមោចនិងស្ករ ។ ទើបមេឈ្មួញរូបនេះកាប់បំផ្លាញព្រៃឈើនៅលើទឹកដីប៊ូស្រា បានយ៉ាងរលូននិងកំពុងធ្វើសកម្មភាពកាប់បំផ្លាញព្រៃឈើ និងបានប្រមូលបងប្អូនជនជាតិដើមភាគតិច អោយចូលទៅកាប់ព្រៃធម្មជាតិ ក្នុងភូមិសាស្ត្រប៊ូស្រា ដោយមិនខ្លាចញញើតមន្ត្រីជំនាញខាងណាបន្តិចសោះឡើយ ។
ជាក់ស្តែងប្រភពច្បាស់ការបានអោយដឹងថា នៅយប់ថ្ងៃទី២៨ ខែមីនា ឆ្នាំ២០១៩ មានរថយន្តឡង់គ្រឺស័រ ប្រភេទកែច្នៃប្រមាណជា២០គ្រឿង បានដឹកជញ្ជូនឈើ ឆ្លងទៅវៀតណាម តាមច្រកទ្វេរភាគីប៉ុស្តិ៍៧-ណាំលៀ ស្រុកពេជ្រាដា ខេត្តមណ្ឌលគិរី រហូតដល់មានបញ្ហាបែកពាងប្រហុក ដូចខ្មោចដំរីងាប់ ទោះចង់លាក់ ក៏លាក់មិនជិតនោះដែរ ខណៈដែលបន្សល់ទុកនូវភស្តុងនៃបទល្មើសដឹកជញ្ជូនឈើ ដោយសារតែមានរថយន្តដឹកឈើក្រឡាប់មួយគ្រឿង ។
ហើយនៅថ្ងៃទី២៩ ខែមីនា ឆ្នាំ២០១៩ ក៏មានការចរាចរណ៍ឡានដឹកបទល្មើសព្រៃឈើយ៉ាងអាណាធិបតេយ្យ ក្នុងភូមិសាស្រ្តមួយចំនួនដូចជា អូរពោត ក្រុមហ៊ុនដាឡាក់ ចំណុចអូរយ៉ាង និងផ្លូវអូររ៉េត ខណៈដែលអាជ្ញាធរស្រុកធ្វើមិនដឹងមិនលឺ ។
ប្រភពបានបន្ថែមថា លោក សារឿន ម៉ាប់ អាចដំណើរការបានយ៉ាងរលូន គឺដោយសារមានក្រុមឈ្មួញដទៃទៀតចូលរួមសហការណ៍ជាមួយ ហើយក៏មានការបើកដៃពីឈ្មោះ ឆុង ដែលដើរអួតប្រាប់គេថាជាមន្ត្រីយោធា និងមានឈ្មោះ ហឿន, ស្នោ, ភ័ក្រ្ត, កណ្តុរ និងមានឈ្មួញឈើជាច្រើននាក់ទៀត ចាំទទួលទិញអនុផលព្រៃឈើទាំងនោះទៀតផង ៕ 
