ស្ត្រីវ័យចំណាស់ជាកម្មករសំណង់ម្នាក់ធ្លាក់ពីសំណង់ផ្ទះល្វែងជាន់ទីមួយស្លាប់បាត់បង់ជីវិតគួរឲ្យអាសូរ
ភ្នំពេញ៖ ដើម្បីផ្តត់ផ្គង់ជីវភាពក្នុងគ្រួសារស្ត្រីវ័យជាង៥០ឆ្នាំម្នាក់រួមជាមួយនឹងប្តីបានមកធ្វើជាកម្មករសំណងនៅការដ្ឋានសង់ផ្ទះល្វែងមួយកន្លែងស្ថិតនៅភូមិរលួស សង្កាត់រលួស ខណ្ឌដង្កោ រាជធានីភ្នំពេញ តែអកុសលស្ត្រីជាប្រពន្ធបានធ្លាក់ពីសំណងផ្ទះល្វែងជាន់ទីមួយ បណ្តាលអោយស្លាប់ពេលបញ្ជូនទៅកាន់មន្ទីរពេទ្យ ៖ ហេតុការណ៍នេះបានកើតឡើងកាលពីវេលាម៉ោងជាង៧ព្រឹកថ្ងៃទី២៩ខែមិនាឆ្នាំ២០១៩។
សមត្ថកិច្ចបានអោយដឹងថាស្ត្រីដែលស្លាប់បាត់បង់ជីវិតនេះមានឈ្មោះ មឹល ក្រមុំ អាយុជាង៥០ឆ្នាំ ស្នាក់នៅក្នុងការដ្ឋានសំណងមានស្រុកកំណើតភូមិស្រម៉រ ឃុំត្រពាំងស្រែ ស្រុកមេសាង ខេត្តព្រៃវែង ។
បើតាមសម្តីរបស់បុរសជាប្តីរបស់សពស្ត្រីខាងលើបាននិយាយរៀបរាប់ថា កាលពីយប់ថ្ងៃទី២៨នេះ ប្រពន្ធរបស់គាត់បានរអ៊ូថា វិលមុខនឹងមិនស្រួលខ្លួនហើយពេលនោះរូបលោកក៏បានឃាត់ប្រពន្ធមិនអោយទៅធ្វើការដែរ ប៉ុន្តែប្រពន្ធគាត់និយាយថា ជិតចូលឆ្នាំហើយបើមិនប្រឹងទេមានលុយឯណាសម្រាប់ទៅស្រុកកំណើតធ្វើបុណ្យទាននឹងគេ ក្រោយពីនិយាយចប់ក៏នាំគ្នាសម្រាក លុះព្រឹកឡើងក៏បន្តការងារធម្មតា ដោយប្រពន្ធគាត់បានឡើងទៅជាន់ទីមួយដើម្បីចងចម្រឹងបន្ទះក្តារចាក់ពុម្ពសសរ ស្រាប់តែពេលនោះ មិនដឹងថាគាត់វិលមុនឬក៏ធ្វេសប្រហែសយ៉ាងម៉េចទេ ក៏បានធ្លាក់ផ្ងារក្រោយមកក្រោមបោកផ្ទប់ដុំថ្មបណ្តាលអោយបែកក្បាលរងរបួសសន្លប់ស្តុកស្តឹង ហើយភ្លាមៗនោះបងប្អូនកម្មកររួមការងារជាមួយគ្នាបានស្រវេស្រវ៉ាជួយលើកដឹកយកទៅពេទ្យ តែអកុសលពេលទៅដល់មន្ទីពេទ្យគាត់បានដាច់ខ្យល់ស្លាប់បាត់ទៅហើយ ។ បុរសជាប្តីបានបន្តថាក្រោយពីដឹងលទ្ធផលថាប្រពន្ធស្លាប់ក៏បានដឹកសពមកទីតាំងការដ្ឋានសំណង់វិញហើយរាយការណ៍ជូនសមត្ថកិច្ចមូលដ្ឋាន។
សមត្ថកិច្ចមូលដ្ឋានបន្ទាប់ពីទទួលបានសេចក្តីរាយការណ៍ភ្លាមៗ ក៏បានសហការជាមួយមន្ត្រីជំនាញចុះមកធ្វើកោសល្យវិច័យ ដោយបញ្ជាក់ថាស្ត្រីខាងលើពិតជាស្លាប់ដោយសារធ្លាក់ពីលើសំណងផ្ទះល្វែងប្រាកដមែន ដូច្នេះសមត្ថកិច្ចបានធ្វើលិខិតប្រល់សពអោយក្រុមសាច់ញាតិដឹកយកទៅធ្វើបុណ្យតាមប្រពៃណីនៅឯស្រុកកំណើត ៕
