ក្មេងប្រុស២នាក់ត្រូវជនជាតិថៃបើករថយន្តបុកស្លាប់យ៉ាងអាណោចអធម៌
ខេត្តកំពង់ធំ៖ បុរសជនជាតិថៃបើករថយន្តមិនប្រយត្ន័ជ្រុលទៅបុកម៉ូតូបណ្ដាលឲ្យក្មេងប្រុស២នាក់ស្លាប់យ៉ាងអាណោចអធម៌
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៦និង២៥នាទីព្រឹកថ្ងៃទី១២ ខែកញ្ញា ឆ្នាំ២០១៨ នៅតាមបណ្ដោយផ្លូវជាតិលេខ៦A ចន្លោះគីឡូម៉ែត្រលេខ១៨៨-១៨៩ ភូមិបាគង ឃុំត្បែង ស្រុកកំពង់ស្វាយ ខេត្តកំពង់ធំ។
ក្មេងប្រុសរងគ្រោះទី១៖មានឈ្មោះ ចាន់ យុត្តិការ ភេទប្រុស អាយុ០៩ឆ្នាំ នៅភូមិត្រាំខ្លា ឃុំត្បែង ស្រុកកំពង់ ស្វាយ ខេត្តកំពង់ធំ និងទី២៖ឈ្មោះ ធួក ឌុល ភេទប្រុស អាយុ៧ឆ្នាំ រស់នៅភូមិ ឃុំជាមួយគ្នា ។
ចំណែកអ្នកបើករថយន្ដបង្កមានឈ្មោះ ផន ថេប ភេទប្រុស អាយុ៤២ឆ្នាំ នៅភូមិបាងកក សង្កាត់បាងកក ក្រុងថេប ប្រទេសថៃ និងអ្នករួមដំណើរ២នាក់ទី១៖ឈ្មោះ ឆាន ណាកាន ភេទស្រី អាយុ២៨ឆ្នាំ នៅភូមិ សង្កាត់ ជាមួយអ្នកបើករថយន្ត និងទី២៖ ឈ្មោះ ម៉ុន ឈន ភេទប្រុស អាយុ៣៥ឆ្នាំ នៅភូមិធ្នុង ឃុំដានរុន ស្រុកសូទ្រនិគម ខេត្តសៀមរាប ។
បើតាមប្រភពព័ត៌មានបានឲ្យដឹងថា មុនកើតហេតុគេឃើញក្មេងប្រុស២នាក់ជិះម៉ូតូមួយគ្រឿងម៉ាកហុងដា C125 ពណ៌ខ្មៅ ស្លាកលេខ តាកែវ 1C-3009 ធ្វើដំណើរតាមបណ្ដោយផ្លូវជាតិលេខ៦Aទិសដៅពី កើតទៅលិច ខណៈមកដល់ចំណុចកើតហេតុបានបត់ ឆ្វេងឆ្លងផ្លូវ ស្រាប់តែពេលនោះដែរក៏មានរថយន្តមួយ គ្រឿងម៉ាក ISUZU ពណ៌ស ស្លាកលេខ ភ្នំពេញ 2AV-7563 បើកបរដោយបុរសជនជាតិថៃ ស្រប ទិសគ្នា មកពីក្រោយលឿនមិនប្រយត្ន័ក៏ជ្រុលទៅបុក ពេញទំហឹង បណ្ដាលឲ្យក្មេងប្រុស២នាក់ស្លាប់គួរឲ្យសង្វេក ។ បន្ទាប់ពីបង្កហេតុភ្លាមៗអ្នកបើកបរនិងអ្នករួម ដំណើរត្រូវបានសមត្ថកិច្ចឃាត់ខ្លួនយកទៅសួរនាំ ។
ក្រោយពេលកើតហេតុសមត្ថកិច្ចជំនាញចុះមកធ្វើការ វាស់វែងយករថយន្តបង្កនិងម៉ូតូយកទៅរក្សាទុកនៅអធិការស្រុកសូទ្រនិគម រងចាំដោះស្រាយតាមផ្លូវច្បាប់នៅពេលក្រោយ ។ ចំណែកសពជនរងគ្រោះ សមត្ថកិច្ចធ្វើកំណត់ហេតុប្រគល់ឲ្យក្រុមគ្រួសារយកធ្វើបុណ្យតាមប្រពៃណី ៕
