មន្ត្រីយោធាម្នាក់សង្ស័យស្រវឹងខ្លាំងបើករថយន្ត ខុសគន្លងទិសដៅ ជ្រុលទៅបុកម៉ូតូជិះឌុបគ្នា២នាក់ប្តីប្រពន្ធ បណ្ដាលឲ្យស្លាប់ប្តីឯប្រពន្ធរបួសធ្ងន់
ភ្នំពេញ ៖ បុរសម្នាក់បើករថយន្តឡិចស៊ីស LX450 លឿន ខ្វះការប្រុងប្រយត្ន័ខុសគន្លងរបស់ការដ្ឋានដាក់លូ ជ្រុលទៅម៉ូតូ ហុងដា ឌ្រីមឌុបគ្នាពីរនាក់ប្ដីប្រពន្ធ បណ្ដាលឲ្យបុរសជាប្ដីស្លាប់និងប្រពន្ឌរបួសធ្ងន់
ហេតុការណ៍គ្រោះថ្នាក់ចរាចរណ៍នេះ បានកើតឡើង កាលពីវេលាម៉ោង៨និង២០នាទីយប់ ថ្ងៃសុក្រទី១៨ ធ្នូ ឆ្នាំ២០២០ នៅតាមបណ្ដោយផ្លូវជាតិលេខ៣ មុខកងពលតូចលេខ៧០ ស្ថិតក្នុងភូមិព្រៃព្រីងត្បូង២ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះដែលស្លាប់មានឈ្មោះ សុន ណង់ ភេទប្រុស អាយុ៣៦ឆ្នាំ ជនជាតិខ្មែរ មុខរបរធ្វើសំណង់ ឯអ្នករបួសធ្ងន់មានឈ្មោះ យី សុខគី ភេទ ស្រី អាយុ៣២ឆ្នាំ ជនជាតិខ្មែរ មុខរបរធ្វើការរោងចក្រ (ត្រូវជាប្រពន្ធ)អ្នកទាំងពីរ រស់នៅភូមិលេខ១ ឃុំស្វាយរលំ ស្រុកស្អាង ខេត្តកណ្តាល ។
ចំណែកអ្នកបើករថយន្តបង្កមានឈ្មោះ ភិន សុផន ភេទប្រុស ជនជាតិខ្មែរ មុខរបរយោធា បញ្ជាការដ្ឋានកងទ័ពជើងគោក កងឯកភាពខុន្ទ កាល័យ ឋានន្តរស័ក្ត វរសេនីយ៍ទោ។
យោងតាមសាក្សីនៅកន្លែងកើតហេតុបានឲ្យដឹងថា មុនកើតហេតុគេឃើញ រថយន្តឡិចស៊ីសLX450 ពណ៍ទឹកមាស ពាក់ស្លាកលេខ ភ្នំពេញ2I.7318 បើកបរដោយបុរស ម្នាក់ជាយោធា សង្ស័យស្រវឹងស្រាជោកជាំ បើកតាមបណ្តោយផ្លូវជាតិលេខ៣ ទិសដៅពីជើងទៅត្បូងក្នុងល្បឿនយ៉ាងលឿន បញ្ច្រាស់ទិសដៅ ជាមួយម៉ូតូហុងដាឌ្រីម ស៊េរីឆ្នាំ២០១៥ C125 ពណ៌ខ្មៅ ពាក់ស្លាកលេខកណ្តាល1R.7396 ដែលធ្វើដំណើរឌុបគ្នាពីរនាក់ប្តីប្រពន្ធពី លុះមកដល់ចំណុចការរដ្ឋានកំពុងដាក់លូ ដោយបើកផ្លូវមួយចំហៀង ហើយផ្លូវមួយចំហៀងនោះ គេដាក់រនាំងដែកពុះចែកគន្លងផ្លូវជា២ សំរាប់មធ្យោបាយធ្វើដំណើរគ្រប់ប្រភេទ ។ លុះមកដល់ចំណុចកើតហេតុ រថយន្តបានជ្រុលបើកមកគន្លងម្ខាងរបស់ម៉ូតូជនរងគ្រោះបណ្ដាលឲ្យ បុកម៉ូតូជនរងគ្រោះ ពេញទំហឹងធ្វើឲ្យបុរសជាប្ដីស្លាប់ ឯប្រពន្ធរងរបួសធ្ងន់ ត្រូវបាន រថយន្តសាមុយក្លីនិកឯកជនដឹកទៅសង្គ្រោះ។
ក្រោយមកសមត្ថកិច្ចបានមកដល់កន្លែងកើតហេតុហើយក៏បាននាំអ្នកបើករថយន្តបង្កដោយមានភាពស្រវឹងទៅប៉ុស្តិ៍នគរបាលរដ្ឋបាលចោមចៅទី២ ដើម្បីប្រគល់ឲ្យសមត្ថកិច្ច ជំនាញចាត់ការបន្ត កាមនីតិវិធី។ចំណែករថយន្តនិងម៉ូតូត្រូវបានសមត្ថកិច្ចយកទៅរក្សាទុកនៅការិយាល័យ ចរាចរណ៍ផ្លូវគោកនៃស្នងការដ្ឋាននគរបាលរាជធានី ភ្នំពេញដើម្បីកសាងសំណុំរឿងចាត់ការបន្តតាមផ្លូវច្បាប់ ។ ចំណែកសពជនរងគ្រោះត្រូវបានសមត្ថកិច្ចធ្វើកំណត់ហេតុរួចប្រគល់ឲ្យសាច់ញាតិដឹកយកទៅស្រុកកំណើតធ្វើបុណ្យតាមប្រពៃណី ៕
