ជនសង្ស័យ៣នាក់ដែលឆក់ការបូបតាមផ្លូវត្រូវតុលាការសម្រេចដាក់ពន្ធនាគារព្រៃស
ភ្នំពេញ៖ ជនសង្ស័យដែលជាមុខសញ្ញា ឆក់ ការបូប តាមដងផ្លូវយ៉ាងសកម្ម នៅក្នុងរាជធានីភ្នំពេញចំនួន៣ នាក់ត្រូវ ចៅក្រមស៊ើបសួរនៃសាលាដំបូងរាជធានី ភ្នំពេញលោកយិនសារឿន នៅព្រឹកថ្ងៃទី២៩ខែសីហា ឆ្នាំ២០១៨ បានចេញដីកាបង្គាប់ឲ្យឃុំខ្លួន ដាក់ពន្ធនាគារព្រៃស ។
ជនសង្ស័យទី១៖មានឈ្មោះ តឺយ ពៅ អាយុ២៨ឆ្នាំ មុខរបរមិនពិតប្រាកដទីលំនៅបច្ចុប្បន្នផ្ទះលេខ៣៧២ ផ្លូវម៉ុងរិទ្ធី សង្កាត់ភ្នំពេញថ្មី ខណ្ឌសែនសុខ ជននេះមានដីកាបង្គាប់ឲ្យចាប់ខ្លួនចេញដោយ លោក ថាន់ ឡេង ចៅក្រមស៊ើបសួរសាលាដំបូងរាជធានីភ្នំពេញ។ ទី២៖ឈ្មោះ ហេង កុសល ហៅតឿ អាយុ២៦ឆ្នាំ មុខរបរជាងជួសជុលទូរស័ព្ទ ស្នាក់នៅផ្ទះលេខ២៤ ផ្លូវលេខ២៨៩ សង្កាត់បឹងកក់ទី២ ខណ្ឌទួលគោក និងទី៣៖ឈ្មោះ ទៀវ បញ្ញា ហៅបញ្ញា អាយុ២០ឆ្នាំ មុខរបរជាងបាញ់ថ្នាំរថយន្ត ស្នាក់នៅផ្ទះលេខ មិនចាំផ្លូវលេខ៥៩៨ សង្កាត់ភ្នំពេញថ្មី ខណ្ឌសែនសុខ។
សូមបញ្ជាក់ថា ជនសង្ស័យទាំង០៣នាក់ ត្រូវបានកម្លាំងសមត្ថកិច្ចធ្វើការស្រាវជ្រាវចាប់ឃាត់ខ្លួនបាន កាលពីថ្ងៃទី២៤ ខែសីហា ឆ្នាំ២០១៨ នៅចំណុច ផ្ទះសំណាក់លេខ៦៩ ផ្លូវឧកញ៉ាម៉ុងរិទ្ធី ភូមិទំនប់១ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ក្រោយពីឃាត់ខ្លួនបានយកទៅធ្វើការសាកសួរជនសង្ស័យ បានសារភាពថា កន្លងមកពួកខ្លួនធ្លាប់ធ្វើសកម្មភាព ឆក់យកកាបូបបានចំនួនតែ២លើក ដោយក្នុងនោះ បានសម្រេចមួយលើកាលពីថ្ងៃទី១៣ ខែមេសា ឆ្នាំ២០១៨ ដោយឆក់កាបូបយួរដៃ ពីជនជាតិ ចិន នៅចំណុចមុខផ្ទះលេខ៧ផ្លូវសុធារស ភូមិទី៣ សង្កាត់ទន្លេបាសាក់ ខណ្ឌចំការមន ក្នុងនោះមាន លិខិតឆ្លងដែនលេខ E២៤០៣៩០៥៨ ចំនួន០១ អត្តសញ្ញាណបណ្ណ័សញ្ជាតិចិន ប្រាក់ហុងកុង ចំនួន៣៦,០០០, ប្រាក់ចិនចំនួន១០,០០០, ប្រាក់តៃវ៉ាន់ ចំនួន៤,០០០, កាតATM ចំនួន១៥, ប្រាក់ដុល្លារអាមេរិក មួយចំនួន និងទូរសព្ទ័ដៃម៉ាក IPhoneX ពណ៌ខ្មៅ ចំនួន០១ផងដែរ៕
