ទីបំផុត! មន្ត្រីនគរបាលប៉ុស្តិ៍បាក់ខែងដែលជាឃាត.ក បាញ់សម្លាប់ប្អូនថ្លៃត្រូវសមត្ថកិច្ចចាប់ខ្លួនហើយ
ស្ទឹងត្រែង៖ ជនសង្ស័យជាឃាត.ក បាញ់សម្លាប់ប្អូនថ្លៃរបស់ខ្លួនកាលពីវេលាម៉ោង០៦និង៣០នាទីព្រលប់ថ្ងៃទី១៥ខែមេសាឆ្នាំ២០២០ នៅចំណុចភូមិ ចុងកោះ ឃុំ កោះឧកញ៉ាតី ស្រុកខ្សាច់កណ្តាលខេត្តកណ្តាល។ ពេលនេះត្រូវបានកម្លាំងសមត្ថកិច្ចធ្វើការស្រាវជ្រាវចាប់ខ្លួនបានហើយកាលពីវេលាម៉ោង៥និង០០នាទីល្ងាចថ្ងៃទី២២ខែមេសាឆ្នាំ២០២០ នៅចំណុចព្រៃជ្រៅមួយកន្លែងស្ថិតក្នុងភូមិអន្លង់ជ្រៃ ឃុំ អន្លង់ជ្រៃ ស្រុកថាឡាបរិវ៉ាត់ ខេត្តស្ទឹងត្រែង ជាប់ព្រំប្រទល់ខេត្តព្រះវិហារ ។
សមត្ថកិច្ចបានឲ្យដឹងថា ជនសង្ស័យដែលជាឃាត.ក មានឈ្មោះ សែម រ៉ានុន ភេទ ប្រុស អាយុ៣៥ឆ្នាំ ជនជាតិ ខ្មែរ មុខរបរជា មន្ត្រី នគរបាល ប៉ុស្តិ៍រដ្ឋបាលបាក់ខែង មានទីលំនៅភូមិ ឃុំ កើតហេតុ ។
ចំណែកជនរងគ្រោះឈ្មោះ ម៉ៅ ប៊ុនហេង ប្រុសអាយុ២៥ឆ្នាំជនជាតិខ្មែរ មុខរបរ លក់ដូរ មានទីលំនៅភូមិឃុំជាមួយគ្នា(ស្លាប់)។
សមត្ថកិច្ចបញ្ជាក់ថា នៅមុនពេលកើតហេតុ ជនសង្ស័យមានទំនាស់ ជាមួយប្រពន្ធរបស់ ខ្លួនឈ្មោះ គង់ សុខជា ដោយជនសង្ស័យបានយកអាវុធខ្លី ភ្ជង់ប្រពន្ធ ពេលនោះជនរងគ្រោះ ចេញមកឃាត់ដោយនិយាយថា ចាំយកកាំភ្លើងភ្ជង់ប្រពន្ធធ្វើអី គ្រាន់តែនិយាយប៉ុណ្ណឹង ស្រាប់តែជនសង្ស័យបាញ់សំដៅទៅជនរងគ្រោះ០១ គ្រាប់ត្រូវបំពង់ក បណ្តាលឲ្យស្លាប់នៅកន្លែង បន្ទាប់ពីបង្កហេតុ ជនសង្ស័យបានយកម៉ូតូឈ្មោះ ផល ជាអ្នកជិតខាងជិះគេចខ្លួនបាត់ ។
សមត្ថកិច្ចបន្តថា រហូតមកដល់ថ្ងៃទី២២ខែមេសាឆ្នាំ២០២០ដោយអនុវត្តតាមបញ្ជា លោកឧត្តមសេនីយ៍ត្រី ឈឿន សុចិត្តស្នងការនគរបាល ខេត្តកណ្តាល ដឹកនាំសម្របសម្រួល ពីលោក ឯក ស៊ុនរស្មី ព្រះរាជអាជ្ញារង អមសាលាដំបូងខេត្តកណ្តាល ដឹកនាំកម្លាំង នៃស្នងការនគរបាលខេត្តកណ្ដាល ដោយលោកឧត្តមសេនីយ៍ ស្នងការរង ផែនការងារព្រហ្មទណ្ឌ សហការជាមួយ កម្លាំងស្នងការដ្ឋាននគរបាលខេត្ត ស្ទឹងត្រែង ទើបឈានដល់ការឃាត់ខ្លួនជនសង្ស័យជាឃាត.កបាននៅវេលាម៉ោង១៧.០០នាទីល្ងាចថ្ងៃទី២២ខែមេសាឆ្នាំ.២០២០ នៅភូមិអន្លង់ជ្រៃ ឃុំ អន្លង់ជ្រៃ ស្រុកថាឡាបរិវ៉ាត់ ខេត្តស្ទឹងត្រែង ។
បច្ចុប្បន្ន ជនសង្ស័យដែលជាឃាត.ក សមត្ថកិច្ច កំពុងធ្វើការសាកសួរដើម្បីកសាងសំណុំរឿងបញ្ជួនទៅតុលាការ ចាត់ការបន្តតាមនិតិវិធីច្បាប់ ៕
