ហួសចិត្ត ! មន្ត្រីនគរបាលម្នាក់លួចកាច់សោរម៉ូតូគេ ម្ចាស់ទាន់ស្រែកឆោឡោ ផ្អើលប្រជាពលរដ្ឋដេញចាប់វាយទ្រោមខ្លួន
ភ្នំពេញ៖ មន្ត្រីនគរបាលម្នាក់ក្លាយទៅជាជនសង្ស័យ លួចកាច់សោរ.កម៉ូតូគេ ត្រូវបានបងប្អូនប្រជាពលរដ្ឋដេញចាប់បានវាយឡើងទ្រោមខ្លួន
ហេតុការណ៍ភ្ញាក់ផ្អើលនេះ បានកើតទ្បើងកាលពីយប់ថ្ងៃទី១០ខែមិនាឆ្នាំ២០២០នៅតាមបណ្ដោយផ្លូវ វេងស្រេង ក្បែរសួនកាណាឌីយ៉ា ស្ថិតនៅភូមិត្រពាំងថ្លឹង២ សង្កាត់ចោមចៅ១ ខណឌពោធិ៍សែនជ័យ រាជធានីភ្នំពេញ ។
ជនសង្ស័យមានឈ្មោះ លន់ ភារិទ្ធ ភេទ(ប)អាយុ២៨ឆ្នាំ ស្នាក់នៅ សង្កាត់ព្រែកឯង ខណ្ឌច្បារអំពៅ មានស្រុកកំណើត ភូមិប្រមាត់ដី ឃុំស្វាយទាប ស្រុកចម្ការលើ ខេត្តកំពង់ចាម ។ ចំណែកជនរងគ្រោះមានឈ្មោះ ឈិន លក្ខណា ភេទស្រី អាយុ៣៦ឆ្នាំ មុខរបរលក់ដូរ ស្នាក់នៅកន្លែងកើតហេតុ និងគ្រឿងមានស្រុកកំណើត ភូមិត្រពាំងសាលា ឃុំឈើកាច់ ស្រុកបាភ្នំ ខេត្តព្រៃវែង។ ឯម៉ូតូដែលជនសង្ស័យ ប៉ុនប៉ងលួច ម៉ាកស្កុបពី ពណ៌ស ពាក់ផ្លាកលេខ ភ្នំពេញ1FH-3378 ។
ជនសង្ស័យ បានសារភាពថា រូបគេ ជាមន្ត្រីនគរបាលជាតិ នៅក្រសួងមហាផ្ទៃ ផ្នែកភស្តុភារ បន្ទាប់ពីឆែកនៅខ្លួន ដកហូតបាន ឧបករណ៍កាច់សោ និងកាតនគរបាលជាតិ។
បើតាមសម្ដីជនរងគ្រោះបានឲ្យដឹងថា មុនពេលកើតហេតុ គាត់វិលពីដឹកឥវ៉ាន់ មកពីផ្សារជម្ពូវ័ន ចតម៉ូតូទុកនៅខាងមុខកន្លែងលក់ដូរ រវល់តែចូលទៅក្នុង លុះវេលាម៉ោងកើតហេតុគាត់ឮសូរសំទ្បេងបញ្ឆេះម៉ូតូ គាត់ចេញមកក្រៅមើលឃើញជនសង្ស័យ កំពុងបញ្ឆេះ បម្រុងជិះចេញ គាត់ក៏ស្រែហៅប្តី និងឆោឡោ ផ្អើលដល់ពលរដ្ឋ ជួយដេញចាប់ជនសង្ស័យបាន រួចស្វាគមន៍ម្នាក់មួយដៃ មួយជើង បណ្ដាលឲ្យបែកមុខហូរឈាមរួចប្រគល់ឲ្យសមត្ថកិច្ច នាំខ្លួនទៅសាកសួរ នៅប៉ុស្តិ៍នគរបាលចោមចៅ១ ហើយជនរងគ្រោះក៏បានទៅដាក់ពាក្យបណ្ដឹង។
បច្ចុប្បន្ន ជនសង្ស័យត្រូវបានសមត្ថកិច្ចកសាងសំណុំរឿង ដើម្បីបញ្ជូនអធិការខណ្ឌ ពោធិសែនជ័យ ចាត់ការបន្តតាមនិតិវិធី៕
