ហួសចិត្ត ! មន្ត្រីនៃមន្ទីរពេទ្យបង្អែកខេត្តតាកែវ ម្នាក់ដេញស្ត្រីម្នាក់ចេញវិញ ប្រាប់ថាមិនទទួលពិនិត្យផ្ទៃពោះថ្ងៃសៅរ៍និងថ្ងៃអាទិត្យ នោះទេ
តាកែវ៖ ប្ដីប្រពន្ធពីរនាក់ ហួសចិត្ត! និងមន្ត្រីមន្ទីរពេទ្យបង្អែក ខេត្តតាកែវ ខណៈបុរសជាប្ដីបានឌុបប្រពន្ធទៅពិនិត្យផ្ទៃពោះ ស្រាប់តែដេញពួកគាត់ចេញដោយ ពោលពាក្យមិនសមរម្យនិងគ្មានសីលធម៌ថា មិនទទួលពិនិត្យ ថ្ងៃសៅរឬថ្ងៃអាទិត្យនោះទេ ។ ជារឿងហេតុដ៏ហួសចិត្តមួយនេះមិនត្រឹមត្រូវតាមការណែនាំរបស់ក្រសួងសុខាភិបាល ឡើយ ដែលមន្ទីរពេទ្យបង្អែកខេត្តតាកែវ ដែលជាពេទ្យរបស់រដ្ឋ បែរជាមិនធ្វើការ ថ្ងៃសៅរ អាទិត្យ ឬ ថ្ងៃបុណ្យទាន ដោយមិនមានពេទ្យប្រចាំការ ឬ មានពេទ្យប្រចាំការហើយ បែរជាដេញអ្នកជំងឺចេញវិញ ដោយពោលពាក្យមិនសមរម្យនិងគ្មានសីលធម៌ ដូច្នេះសោះ ។
ស្ត្រីមានផ្ទៃពោះម្នាក់ឈ្មោះ សុខ សុភ័ក្ត អាយុ២៦ឆ្នាំបានថ្លែងប្រាប់ អ្នកសារព័ត៌មានយើងថា នៅព្រឹកថ្ងៃទី២៥ ខែមករា ឆ្នាំ២០២០នេះថា លោកស្រីនិងប្តី បានធ្វើដំណើរទៅកាន់មន្ទីរពេទ្យបង្អែកខេត្តតាកែវ ដើម្បីពិនិត្យផ្ទៃពោះ ។ ប៉ុន្តែ គ្រាន់តែទៅដល់មុខសម្ភពពិនិត្យពោះភ្លាម បុរសម្នាក់ជាពេទ្យនៅទីនោះបាន ប្រាប់ថា ទើបតែដេញស្ត្រីម្នាក់ចេញ ឥឡូវមកម្នាក់ទៀត និង បានរួចនិយាយថា ពេទ្យមិនទទួលពិនិត្យថ្ងៃសៅរ៍ ទេ ។
ខណៈដែលស្ត្រីរូបនោះមានប័ណ្ណ “បសស” ផងនោះ គ្រាន់តែឮពាក្យសម្តីអសីលធម៌និងគ្មានក្រមវិជ្ជាជីវៈជាពេទ្យបែបនេះ លោកស្រីនិងប្តី ក៏បានចាកចេញពីពេទ្យវិញ តែម្តង និង សម្តែងការហួសចិត្តយ៉ាងខ្លាំង ។ ទន្ទឹមនេះ លោកស្រី ក៏បានសំណូមដល់លោកវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល មេត្តាពិនិត្យឥរិយាបថនិងក្រមសីលធម៌ មន្ត្រី បុគ្គលិកនៃមន្ទីរពេទ្យបង្អែកខេត្តតាកែវ ផង ។
ជុំវិញនិងការលើកឡើងនេះ លោក ឆូវ ឈួន ប្រធានមន្ទីរពេទ្យបង្អែកខេត្តតាកែវ ថ្លែងប្រាប់ អ្នកសារព័ត៌មានថា ការពិនិត្យផ្ទៃពោះ គឺ មិនគិតថា ថ្ងៃសៅរ៍ ថ្ងៃអាទិត្យ ឈប់ ឬថ្ងៃបុណ្យទានអ្វីនោះទេ ពោលគឺ មន្ទីរពេទ្យតែងតែមានពេទ្យប្រចាំការជានិច្ច ។
ទោះបីយ៉ាងណា លោកប្រធានមន្ទីរពេទ្យបង្អែកខេត្តតាកែវ នឹងសួរនាំករណីនេះអោយបានច្បាស់ទៅកាន់មន្ត្រីរបស់ខ្លួន ។
សូមបញ្ជាក់ថា កន្លងមក មន្ទីរពេទ្យបង្អែកខេត្តតាកែវ ក៏ធ្លាប់មានបញ្ហាផងដែរ ជុំវិញការមិនយកចិត្តទុកដាក់លើអ្នកជំងឺ ។ ប៉ុន្តែខាងមន្ទីរពេទ្យបង្អែកខេត្តតាកែវ បានចេញលិខិតបដិសេធ ៕
