អាសូរណាស់! បុរសម្នាក់ត្រូវរថយន្តបែនដឹកដីកិនស្លាប់យ៉ាងអាណោចអធម៌
ភ្នំពេញ៖ រថយន្តបែនដឹកដីបើកបរក្នុងល្បឿនលឿនខ្វះការប្រុងប្រយត្ន័ជ្រុលទៅប៉ះម៉ូតូ (កូនទា) ដែលជិះដោយបុរសម្នាក់បណ្ដាលឲ្យដួល រួចរថយន្តកិនពីលើជនរងគ្រោះខ្ទេចខ្លួនមើលលែងស្គាល់ស្លាប់គួរឲ្យរន្ធត់
គ្រោះថ្នាក់ចរាចរណ៍នេះបង្កឲ្យមានការភ្ញាក់ផ្អើលកាលពីវេលាម៉ោង១០ និង៣០នាទីយប់ ថ្ងៃទី១៧ខែមករា ឆ្នាំ២០២០ នៅចំណុចមុខផ្សារស្ទឹងមានជ័យចាស់ តាមបណ្ដោយផ្លូវ២១៧ ភូមិភ្នាត សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ ។
សពជនរងគ្រោះមិនទាន់ស្គាល់អត្តសញ្ញាណនោះទេ ដោយសមត្ថកិច្ចកំពុងស្រាវជ្រាវរកសាច់ញាតិ ។ ចំណែកអ្នកបើកបររថយន្តបង្កមានឈ្មោះ តាំង ពិសិទ្ធ ភេទប្រុស អាយុ២៧ឆ្នាំមុខរបរបើកបរថយន្ត មានទីលំនៅភូមិសំរោង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញបុរសរងគ្រោះជិះម៉ូតូ( កូនទា )១គ្រឿងពណ៌ផ្កាឈូកលាយស ពាក់ស្លាកលេខភ្នំពេញ 1GV-0473 ធ្វើដំណើរតាមបណ្ដោយផ្លូវ២១៧ ទិសដៅពីលិចទៅកើតក្នុងល្បឿនល្មម ខណៈមកដល់ចំណុចកើតហេតុស្រាប់តែមានរថយន្តបែនដឹកដី១គ្រឿង ពាក់ស្លាកលេខ ព្រះសីហនុ 3A-2810 បើកមកពីក្រោយធ្វើដំណើរស្របទឹសគ្នាក្នុងល្បឿនលឿន មិនប្រយត្ន័ក៏ជ្រុលទៅប៉ះម៉ូតូបណ្ដាលឲ្យដួល រួចកិនជនរងគ្រោះទាំងកំរោល ខ្ទេចសព រាយពេញផ្លូវ ស្លាប់គួរឲ្យសង្វេក ។
ប្រភពបន្តថា បន្ទាប់ពីបង្កហេតុភ្លាមៗអ្នកបើកបរមិនព្រមឈប់ទទួលខុសត្រូវនោះទេបែជាព្យាយាមបើករថយន្តបន្តដំណើរទៅបំណងគេចខ្លួនតែត្រូវបានប្រជាពលរដ្ឋដែលឃើញហេតុការណ៍នាំគ្នាជួយអន្តរាគមន៍ដេញតាមឃាត់បានទាំងអ្នកបើកបរនិងរថយន្ត ប្រគល់ឲ្យសមត្ថកិច្ច នគរបាលប៉ុស្តិ៍ ស្ទឹងមានជ័យ២យកទៅធ្វើការសាកសួរ ។
ក្រោយពេលកើតហេតុសមត្ថកិច្ចមូលដ្ឋានបានទំនាក់ទំនងទៅសមត្ថកិច្ចជំនាញមកវាស់វែងយករថយន្តបង្កនិងម៉ូតូជនរងគ្រោះទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញដើម្បីកសាងសំណុំរឿងចាត់ការតាមនីតិវិធី នៃច្បាប់ ។ ចំណែកសពជនរងគ្រោះ ត្រូវសមត្ថកិច្ចធ្វើកំណត់ហេតុរួចឲ្យខាងរថយន្តសាមុយដឹកយកទៅតម្កល់នៅវត្តស្ទឹងមានជ័យ រង់ចាំស្រាវជ្រាវរកសាច់ញាតិមកទទួលយកទៅធ្វើបុណ្យតាមប្រពៃណី៕
