នារីក្លាហាន(បងធំមេសាង)ត្រូវនគរបាលឃាត់ខ្លួនហើយ
ព្រៃវែង)៖ បន្ទាប់ពីបែកធ្លាយវីដេអូ កក្រើកពេញបណ្តាញសង្គមFacebookដែលយុវតី ម្នាក់រហ័សនាម(បងធំមេសាង ខេត្តព្រៃវែង)ប្រើប្រាស់កាយវិការមិនសមរម្យនិងគំរាមវាយគូជម្លោះ ដោយគ្រាន់តែជិះម៉ូតូទៅលេងស្រុករបស់ខ្លួននោះ ពេលនេះត្រូវបានកម្លាំងសមត្ថកិច្ចស្រាវជ្រាវតាមចាប់ខ្លួនយកសួរនាំ ហើយនៅថ្ងៃទី១៣ ខែមករា ឆ្នាំ២០២០នេះ។
បើយោងតាមរយៈវីដេអូ ដែលគេនាំគ្នាចែកចាយពេញក្នុងបណ្ដាញសង្គមកាលពីពេលថ្មីៗនេះ យុវតីខាងលើ និងបក្ខពួកជាច្រើននាក់ ទៀតបានស្ទាក់ម៉ូតូរបស់យុវតីចំនួន៤នាក់ផ្សេងទៀត ដែលជាអ្នកមកពីស្រុកផ្សេង មិនមែននៅស្រុកមេសាងនោះ ។ ហើយមូលហេតុដែលក្រុមយុវតីបងធំស្ទាក់សួរនាំ និងគំរាមរកវាយនោះ ដោយសារតែភាគីម្ខាងទៀត បានមើលមុខឌឺដងដាក់ខ្លួន។
សមត្ថកិច្ចនគរបាលស្រុកមេសាងបានឲ្យដឹងនៅរសៀលថ្ងៃទី១៣ខែមករាឆ្នាំ២០២០នេះថា ក្រោយពីបានឃើញវីដេអូមិនសមរម្យដែលត្រូវបានចែកចាយ ក្នុងបណ្ដាញហ្វេសប៊ុក ដែលអាចនាំអោយប៉ះពាល់ដល់សន្ដិសុខ សណ្ដាប់ធ្នាប់សង្គម ក៏បានធ្វើការស្រាវជ្រាវ និងឈានដល់ការឃាត់ខ្លួនយុវតីរូបនោះយកមកសួរនាំ។
យុវតីដែលអ្នកប្រើប្រាស់បណ្ដាញសង្គមឲ្យរហ័សនាមថា «បងធំមេសាង» មានឈ្មោះ ចាន់រី ជាសិស្សរៀនថ្នាក់ទី១១ នៅវិទ្យាល័យមេសាង ហើយកើតហេតុតាំងពីថ្ងៃទី១១ ខែមករា ឆ្នាំ២០២០កន្លងមកម្លេះបន្ទាប់ពីយុវតីទាំងអស់នោះ មកពីមើលគេប្រកួតបាល់នៅវិទ្យាល័យមេសាង។
អធិការនគរបាលស្រុកមេសាង បានបញ្ជាក់ថា បន្ទាប់ពីឃាត់ខ្លួនមកសួរនាំ កម្លាំងសមត្ថកិច្ចជំនាញបានធ្វើការអប់រំយុវតីខាងលើ ហើយបានអោយអាណាព្យាបាល មកធានានិងធ្វើកិច្ចសន្យាឲ្យបញ្ឈប់នូវសកម្មភាពបែបនេះ ទើបអនុញ្ញាតឲ្យត្រឡប់ទៅផ្ទះវិញ មិនបានកសាងសំណុំរឿងបញ្ជួននោះទេ៕
