សង្ស័យបែកថ្នាំ យកប្រេងកាតចាក់ដុតសម្ភារៈក្នុងផ្ទះយាយឆាបឆេះសន្ធោសន្ធៅ
ភ្នំពេញ៖ យុវជនម្នាក់ដែលអ្នកជិតខាងដឹងថាមានសតិមិនប្រក្រតី បានយកប្រេងកាតដុតផ្ទះយាយរបស់ខ្លួន បណ្ដាលឲ្យឆេះសម្ភារៈក្នុងផ្ទះយ៉ាងសន្ធោសន្ធៅ បង្កការភ្ញាក់ផ្អើលដល់សមត្ថកិច្ចចេញរថយន្តពន្លត់អគ្គិភ័យមកអន្តរាគមន៍ បាញ់ពន្លត់កាលពីវេលាម៉ោង២និង៣០នាទីរំលងអាធ្រាត្រចូលថ្ងៃទី១២ ខែតុលាឆ្នាំ២០១៩ នៅចំណុចផ្ទះល្វែងមួយកន្លែងរថនៅជាន់ទី២ តាមបណ្ដោយផ្លូវ១០៧ កែងនិងផ្លូវកម្ពុជាក្រោម ក្នុងសង្កាត់មនោរម្យ ខណ្ឌ៧មករា ។
យុវជនដែលដុតមានឈ្មោះ ផុត យូណាម អាយុ២៧ឆ្នាំ មុខរបសន្តិសុខឯកជន រស់នៅផ្ទះកើតហេតុជាមួយយាយ ។
បើតាមសម្ដី ស្ត្រីចំណាស់ដែលត្រូវជាយាយរបស់ជនបង្ក បានប្រាប់ឲ្យដឹងថា នៅយប់ថ្ងៃកើតហេតុ គាត់ឃើញចៅប្រុសរបស់គាត់មានអាការៈដូចជាបែកថ្នាំ ព្រោះចៅរបស់គាត់ធ្លាប់ប្រើប្រាស់សារធាតុញៀន បន្ទាប់បានប្រមូលខោអាវ ព្រមទាំងសម្ភារៈក្នុងផ្ទះមួយចំនួន រួចចាក់ប្រេងកាតដុត បណ្ដាលឲ្យឆាប់ឆេះ សន្ធោសន្ធៅ ផ្អើលដល់អ្នករស់នៅជិតខាងនាំគ្នាយកបំពង់ពន្លត់អគ្គីភ័យមកបាញ់ពន្លត់តែមិនរលត់ក៏បានរាយការណ៍ប្រាប់ទៅអាជ្ញាធរមានសមត្ថកិច្ច ចេញរថយន្តពន្លត់អគ្គីភ័យ មកអន្តរាគមន៍បាញ់ពន្លត់ច្រើនគ្រឿង ។
សមត្ថកិច្ចបានឲ្យដឹងថា ហេតុការណ៍អគ្គីភ័យនេះ កម្លាំងជំនាញបានចេញរថយន្តពន្លត់អគ្គិភ័យចំនួន៩គ្រឿង ប្រើប្រាស់ទឹកអស់តែ៨ឡាន និងប្រើពេលជាង១ម៉ោង ទើបបាញ់រលត់ទៅវិញជាស្ថាពរ ។
សមត្ថកិច្ចបន្តថា សំណាងល្អក្នុងហេតុការណ៍នេះមិនបណ្ដាលឲ្យមនុស្សណាម្នាក់រងរបួសនោះទេ ។ ចំពោះយុវជនសង្ស័យបែកថ្នាំខាងលើ ត្រូវបានសមត្ថកិច្ចធ្វើការឃាត់ខ្លួនយកទៅកាន់ប៉ុស្ដិ៍នគរបាលរដ្ឋបាល មនោរម្យ ដើម្បីសួរនាំនិងចាត់ការតាមនីតិវិធី ច្បាប់៕
