សមត្ថកិច្ចចាប់ខ្លួនជនសង្ស័យ២នាក់បន្ថែមទៀតពាក់ពន្ធករណីបាញ់សម្លាប់ចិនដូចគ្នានៅកណ្ដាលក្រុងព្រះសីហនុ
ព្រះសីហនុ៖ សមត្ថកិច្ចក្រុងព្រះសីហនុបានឃាត់ខ្លួនជនសង្ស័យ២នាក់បន្ថែមទៀតពាក់ពន្ធនិងករណីបាញ់សម្លាប់ជនជាតិចិនដូចគ្នាកាលពីថ្ងៃទី០៦ ខែតុលា ឆ្នាំ២០១៩ កន្លងទៅ នៅចំកណ្ដាលក្រុងព្រះសីហនុ ។
សមត្ថកិច្ចខេត្តព្រះសីហនុ ឲ្យដឹងនៅរសៀលថ្ងៃទី១១ខែតុលាឆ្នាំ២០១៩នេះថា ជនសង្ស័យជាខ្មាន់កាំភ្លើង៤នាក់ ដែលបាញ់សម្លាប់ជនជាតិចិនដូចគ្នាពេលនេះកម្លាំងជំនាញចាប់ខ្លួនបាន២នាក់បន្ថែមទៀតហើយ និង ដកហូតបានកាំភ្លើងខ្លី បានមួយដើមដែលជាវត្ថុតាងធ្វើសកម្មភាពបាញ់ប្រហា ។ ពេលនេះកម្លាំងជំនាញកំពុងធ្វើការសួរនាំនិងស្រាវជ្រាវដើម្បីតាមចាប់បក្ខពួកផ្សេងទៀត។
គួររំលឹកថា កាលពីវេលាម៉ោងជាង៨ព្រឹកថ្ងៃទី០៦ខែតុលា ឆ្នាំ២០១៩ មានករណីជនជាតិចិន៣នាក់ បានរុញជនជាតិចិនម្នាក់ចេញពីរថយន្ត រួចបាញ់សម្លាប់គួរឲ្យរន្ធត់ នៅចំកណ្ដាលក្រុង ស្ថិតក្នុងសង្កាត់លេខ៣ ក្រុងនិងខេត្តព្រះសីហនុ។ក្រោយកើតហេតុភ្លាមៗ សមត្ថកិច្ចកម្លាំងនគរបាលខេត្តព្រះសីហនុ បានអន្តរាគមន៍ឃាត់ខ្លួនបានជនល្មើស ដែលជាជនជាតិចិនប្រុសស្រី២នាក់ តែទោះជាយ៉ាណា សមត្ថកិច្ច មិនទាន់បញ្ជាក់លម្អិតអំពីករណីនេះនៅឡើយទេ។
សូមបញ្ជាក់ថា កន្លងទៅ ករណីឃាតកម្មលើជនជាតិចិន បានកើតឡើងជាបន្តបន្ទាប់នៅខេត្តព្រះសីហនុ ខណៈដែលសមត្ថកិច្ច ក៏បានបង្កើនការរឹតបន្តឹងសន្តិសុខ កាន់តែខ្លាំងផងដែរ៕
