នគរបាលឃាត់ខ្លួនសិស្សសាលាAISម្នាក់បន្ទាប់ពីវាយគ្នាបណ្ដាលឲ្យភាគីម្ខាងទៀតស្លាប់
ភ្នំពេញ៖ សិស្សសាលាអន្ដរទ្វីបអាមេរិកកាំង AIS ២នាក់វាយតប់គ្នាបណ្ដាលឲ្យភាគីម្ខាងរងរបួសធ្ងន់ធ្ងរ រួចបានស្លាប់ ពេលបញ្ជូនទៅសង្គ្រោះនៅមន្ទីរពេទ្យ
ហេតុការណ៍ភ្ញាក់ផ្អើលនេះបានកើតឡើងនៅល្ងាចថ្ងៃទី១៨ខែមករាឆ្នាំ២០២០ នៅចំនុចផ្លូវ៤០២ក្រុម១១ ភូមិ២ សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ ។
សមត្ថកិច្ច បានឲ្យដឹងថា នៅមុនពេលកើតហេតុ ជនរងគ្រោះរួមជាមួយមិត្តភ័ក្រ បានជិះម៉ូតូចេញពីសាលាអន្ដរទ្វីបអារមេរិចកាំង ទៅជួបជនសង្ស័យ នៅផ្លូវ៤០២ សង្កាត់ទំនប់ទឹក ខណ្ឌបឹងកេងកងដោយបានណាត់វ៉ៃគ្នាជាមួយជនសង្ស័យ ដោយសារមានទំនាស់ ពាក្យសម្ដីជាមួយគ្នា (រឿងហៅអា) ។
សមត្ថកិច្ចបានបន្តថា បន្ទាប់ពីជនរងគ្រោះបានទៅជួប ជនសង្ស័យក៏បានវាយជនរងគ្រោះមួយដៃចំកណ្ដាលដើមទ្រូង ធ្វើឲ្យជនរងគ្រោះដួល ភ្លាមៗនោះ ជនសង្ស័យក៏បានជិះម៉ូតូម៉ាក Today គេចខ្លួនបាត់តែម្ដង។ បន្ទាប់មកជនរងគ្រោះត្រូវបានមិត្តភ័ក្រ្ដ ជូនទៅមន្ទីរពេទ្យមិត្តភាពខ្មែរ–សូវៀត លុះពេលទៅដល់គ្រូពេទ្យប្រាប់ថា ជនរងគ្រោះបានស្លាប់បាត់បង់ជីវិតហើយ។
ជនរងគ្រោះមានឈ្មោះ សំ សន្ធិវង្ស អាយុ១៤ឆ្នាំ រៀនថ្នាក់ទី( ៩ឃ )នៅសាលាអន្តរទ្វីបអាមេរិកាំង AIS ស្នាក់នៅផ្ទះលេខ៤៣០ ផ្លូវ២៤BT ភូមិត្នោតជ្រំ សង្កាត់បឹងទំពន់ ខណ្ឌមានជ័យ ។
ចំណែកជនសង្ស័យឈ្មោះ នី លីស៊ាង ជាសិស្សរៀននៅសាលា AIS ដូចគ្នា ស្នាក់នៅផ្ទះលេខ៣A ផ្លូវ១២BT សង្កាត់បឹងទំពន់ទី១ ខណ្ឌមានជ័យ។
បច្ចុប្បន្ន ជនសង្ស័យត្រូវសមត្ថកិច្ចចាប់ខ្លួនធ្វើការសាកសួរ នៅអធិការនគរបាល ខណ្ឌបឹងកេងកង ដើម្បីកសាងសំណុំរឿងចាត់ការបន្តតាមនិតិវិធីច្បាប់ ។ ដោយឡែកសពជនរងគ្រោះ បន្ទាប់ពីសមត្ថកិច្ច ធ្វើកោសល្យវិច្ច័យចប់ បានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕ 
