រថយន្តមិនស្គាល់ម៉ាកបើកបុកបុរសម្នាក់ស្លាប់គួរឲ្យសង្វេករួចបើកគេចបាត់
ភ្នំពេញ៖ បុរសម្នាក់ត្រូវរថយន្តមិនស្គាល់ម៉ាកបើិកបុកពេញទំហឹង ស្លាប់យ៉ាងអាណោចអធម៌ ៖ គ្រោះថ្នាក់ចរាចរណ៍កើតឡើងកាលពីវេលាម៉ោង២ និង១០នាទីរំលងអាធ្រាតចូលថ្ងៃទី២៤ខែសីហាឆ្នាំ២០១៩ នៅតាមបណ្ដោយផ្លូវលេខ២៦១ កែងផ្លូវលេខ១៥៦ សង្កាត់ទឹកល្អក់២ ខណ្ឌទួលគោក ។
សពជនរងគ្រោះមានឈ្មោះ សៀង ដារិទ្ធ ភេទប្រុស ជិះម៉ូតូម៉ាក ស៊ុយសុគីនិក ពណ៌ស ស្លាកលេខ ភ្នំពេញ 1DE-4544 ។
យោងតាមប្រភពព័ត៌មានពីប្រជាពលរដ្ឋបានឲ្យដឹងថា នៅពេលកើតហេតុ គេឃើញ ជនរងគ្រោះ ជិះម៉ូតូម្នាក់ឯង ធ្វើដំណើរតាមផ្លូវលេខ១៥៦ទិសដៅពីកើតទៅលិចក្នុងល្បឿនល្មម ខណៈមកដល់ចំណុចកើតហេតុ ស្រាប់តែមានរថយន្តមួយគ្រឿង មិនស្គាល់ម៉ាក បានធ្វើដំណើរតាមបណ្ដោយផ្លូវ២៦១ ទិសដៅពីជើងទៅត្បូង ក្នុងល្បឿនយ៉ាងលឿន លុះមកដល់ចំណុចកើតហេតុ មិនប្រយត្ន័ក៏ជ្រុលទៅបុកម៉ូតូជនរងគ្រោះចំពីចហៀងពេញទំហឹង បណ្ដាលឲ្យជនរងគ្រោះផ្លោងអូសជាង១០ម៉ែត្រ ស្លាប់ភ្លាមៗនៅនិងកន្លែង រីឯម៉ូតូបានអូសជាង៤០ម៉ែត្របានរងការខូចខាត ។
ក្រោយកើតហេតុភ្លាមៗរថយន្តបង្កមិនឈប់ទទួលខុសត្រូវនោះទេ គឺបានព្យាយាមបើកគេចបាត់ស្រមោល ។ បន្ទាប់មកសមត្ថកិច្ចជំនាញចុះមកធ្វើការវាស់វែងយកម៉ូតូជនរងគ្រោះទៅរក្សាទុកចាំប្រគល់ឲ្យសាច់ញាតិនៅពេលក្រោយ។ ចំណែកសពជនរងគ្រោះត្រូវបានសមត្ថកិច្ចធ្វើកំណត់ហេតុ រួចដឹកយកទៅតម្កល់នៅវត្តទឹកថ្លា រង់ចាំស្រាវជ្រាវរកសាច់ញាតិយកទៅធ្វើបុណ្យ៕
