ភ្លើងប្រចណ្ឌចាក់សាំងដុតសម្លាប់ប្រពន្ធរួចរត់គេចខ្លួន៤ថ្ងៃ ត្រូវសមត្ថកិច្ចតាមចាប់ខ្លួនបាន
ភ្នំពេញ ៖ បុរសចិត្តខ្លាំងចាក់សាំងដុតសម្លាប់ប្រពន្ធព្រោះភ្លើងប្រចណ្ឌរួចរត់គេចខ្លួនបានចំនួន៤ថ្ងៃត្រូវសមត្ថកិច្ចស្រាវជ្រាវតាមចាប់ខ្លួនបានហើយ កាលពីថ្ងៃទី១០ខែមិថុនា ឆ្នាំ២០២០ នៅក្នុងព្រៃ នាឃុំរស្មីសាមគ្គីស្រុករ៉ាល់ ខេត្តកំពង់ស្ពឺ។
ប្រតិបត្ដិការនេះធ្វើឡើងដោយកម្លាំងនាយកដ្ឋាននគរបាលព្រហ្មទណ្ឌ សហការជាមួយកម្លាំងស្នងការដ្ឋាននគរបាលខេត្តកណ្ដាល និងនគរបាលខេត្តកំពង់ស្ពឺ ។
ជនសង្ស័យមានឈ្មោះ ងួន ហៅតឿ អាយុ៥១ឆ្នាំ មុខរបរកម្មករសំណង់ បានចាក់សាំងដុតសម្លាប់ប្រពន្ធឈ្មោះ សរ ចាន់ អាយុ៤៧ឆ្នាំ មុខរបរកម្មការិនីរោងចក្រ នៅចំណុចភូមិព្រៃផ្ចឹតឃុំឈ្វាំងស្រុកពញាឮ ខេត្តកណ្តាល កាលពីថ្ងៃទី០៦ខែមិថុនាឆ្នាំ២០២០កន្លងទៅ ។
សមត្ថកិច្ចបញ្ជាក់ថា កន្លងមកជនរងគ្រោះនិងជនសង្ស័យ បានមានទំនាក់ទំនងស្នេហា និងបានរស់នៅជាមួយគ្នាជាប្តី ប្រពន្ធរហូតមកតាំងពីឆ្នាំ២០១៨។
លុះមកដល់អំឡុងខែឧសភា ឆ្នាំ២០២០ ជនសង្ស័យបានផឹកស្រាស្រវឹង ហើយបានមករករឿងជនរងគ្រោះ ដោយប្រចណ្ឌជនរងគ្រោះ និងចោទថា ជនរងគ្រោះ លួចមានប្រុសថ្មី ហើយមិននិយាយរកគ្នាជាង០១ខែមកហើយ។
លុះដល់ថ្ងៃកើតហេតុ ជនសង្ស័យបានសុំជនរងគ្រោះត្រូវគ្នាវិញប៉ុន្តែជនរងគ្រោះមិនព្រម បន្ទាប់មកជនសង្ស័យ ទៅដេកលើគ្រែក្នុងផ្ទះតែម្នាក់ឯង ។ ចំណែកជនរងគ្រោះបានដេកលើគ្រែខាងមុខជាមួយកូនស្រីឈ្មោះ ចាន់ ស្រីនិច អាយុ១៩ឆ្នាំ ។
ពេលនោះស្រាប់តែជនសង្ស័យ បានយកសាំង០៤ដបទឹកសុទ្ធ ចំណុះកន្លះលីត្រស្មើ០២លីត្រដែលបានទិញទុករួចជាស្រេចយកទៅចាក់ស្រោចលើជនរងគ្រោះ រួចដុតតែម្ដង ហើយជនសង្ស័យ លូនចេញតាមប្រឡោះក្តារជញ្ជាំងផ្ទះ គេចខ្លួនបាត់ ។
ភ្លាមនោះកូនស្រី របស់ជនរងគ្រោះភ្ញាក់ដឹងខ្លួន ឃើញភ្លើងឆេះម្តាយ ក៏ស្រែកឆោឡោឲ្យគេជួយពន្លត់ និងបានដឹកយកម្តាយទៅព្យាបាលរបួស នៅមន្ទីរពេទ្យ កាល់ម៉ែត្ររាជធានីភ្នំពេញ រហូតដល់ម៉ោង១១ថ្ងៃខែឆ្នាំដដែល ជនរងគ្រោះបានស្លាប់នៅមន្ទីរពេទ្យកាល់ម៉ែត្រ បានរថយន្តរបស់មន្ទីរពេទ្យ ដឹកសពជនរងគ្រោះត្រឡប់មកផ្ទះវិញដើម្បីធ្វើបុណ្យតាមប្រពៃណី ៕
