អាណិតណាស់! បើកគោយន្តដឹកដីចាក់ក្នុងវត្ថរួចបើកចេញមកវិញបុកក្លោងទ្វារដួលរលំសង្កត់ស្លាប់ពីរនាក់
សៀមរាប៖ បុរសពីរនាក់បានស្លាប់បាត់បង់ជីវិតយ៉ាងអាណោចអធម៌ ខណៈបើកគោយន្តដឹកដីចាក់ក្នុងវត្ថលុះចេញមកវិញបើកលឿនខ្វះការប្រុងប្រយត្ន័ជ្រុលទៅបុកក្លោងទ្វារវត្ថបណ្ដាលឲ្យដួលរលំសង្កត់ពីលើគាបជាប់និងគោយន្ត
ហេតុការណ៍បង្កឲ្យមានការភ្ញាក់ផ្អើលគួរឲ្យរន្ធត់នេះបានកើតឡើងកាលពីវេលាម៉ោង២និង៤០នាទីរសៀលថ្ងៃទី២៥ខែកុម្ភៈឆ្នាំ២០២០ នៅវត្ថព្រៃជ្រូក ភូមិព្រៃជ្រូក ឃុំព្រៃជ្រូកស្រុកពួកខេត្តសៀមរាប។
ជនរងគ្រោះដែលស្លាប់ទាំងពីរនាក់ទី១៖ មានឈ្មោះ តាល់ កាឡី ភេទប្រុស អាយុ៥៥ឆ្នាំ រស់នៅភូមិ-ឃុំកើតហេតុខាងលើមុខរបរបើកគោយន្តដឹកដី ។
ទី២-ឈ្មោះ សុខ ផេង ភេទប្រុស អាយុ១៩ឆ្នាំ រស់នៅសៀមរាប។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគឺបុរសរងគ្រោះទាំងពីរនាក់បានបើកគោយន្ដដឹកដីចាក់ក្នុងវត្តព្រៃជ្រូក លុះត្រលប់ចេញពីចាក់ដីមកវិញ ឈ្មោះ សុខ ផេង ភេទប្រុស ជាអ្នកជិះជាមួយ ដោយចង់រៀនបើកគោយន្តក៏បានសុំឈ្មោះ តាល់ កាឡី បើកជំនួសដោយខ្លួនមិនទាន់ចេះបើកតែបើកក្នុងល្បឿនលឿនខ្វះការ ប្រុងប្រយត្ន័ ហើយមិនបានទំលាក់ទ្រុងបែន ចុះក្រោម ទើបបណ្ដាលឲ្យទាក់និងក្លោងទ្វារវត្តដួលរលំសង្កត់ពីលើ ជនរងគ្រោះទាំងពីរស្លាប់ភ្លាមៗនៅនឹងកន្លែងកើតហេតុតែម្ដង។
សមត្ថកិច្ចបានដឹងថា ម្ចាស់ កម្មសិទ្ធិគោយន្តមានឈ្មោះ ហោ ដារិទ្ធ ភេទប្រុសអាយុ៣៣ឆ្នាំរស់នៅភូមិស្វាយដង្កុំ សង្កាត់ស្វាយដង្កុំ ក្រុងសៀមរាប ខេត្តសៀមរាប។
ក្រោយពេលកើតហេតុសមត្ថកិច្ចជំនាញបានចុះដល់កន្លែងកើតហេតុ និងអោយអេស្កាវទ័រកាយយកគោយន្តនិងសពបុរសរងគ្រោះទាំងពីរនាក់ចេញរួចយកគោយន្តទៅរក្សាទុកនៅអធិការដ្ឋាននគរបាលស្រុកពួក រង់ចាំធ្វើការដោះស្រាយគ្នាពេលក្រោយ ។ ចំណែកសពជនរងគ្រោះទាំងពីរនាក់ ត្រូវបានសមត្ថកិច្ចធ្វើកំណត់ហេតុប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី៕
