ប្រទះឃើញសកសព បុរសម្នាក់មានសភាពឆេះខ្លោចសង្ស័យជាករណីឃាតកម្ម
ភ្នំពេញ៖ សាកសពបុរសម្នាក់មានសភាពឆេះខ្លោចសង្ស័យករណីឃាតកម្មសម្លាប់រួចដុតចោលបំបាត់ភស្តុតាង ត្រូវបានប្រជាពលរដ្ឋប្រទះឃើញ ៖ ហេតុការណ៍នេះបានបង្កឲ្យមានការភ្ញាក់ផ្អើលយ៉ាងខ្លាំងកាលពីវេលាម៉ោង៧ព្រឹកថ្ងៃទី២៣ខែមករាឆ្នាំ២០២០ នៅចំណុចវាល កប់ខ្មោច (មុងចិន) មុខវត្តតាភេម ភូមិតាភេម សង្កាត់កំបូល ខណ្ឌកំបូល រាជធានីភ្នំពេញ ។
សាកសពមិនទាន់ស្គាល់អត្តសញ្ញាណភេទប្រុស អាយុប្រហែលជាង៣០ឆ្នាំ ស្លៀកខោគគីជើងខ្លី ហោប៉ាវ៤ ពណ៌ទឹកដោះគោ អាវឆេះអស់ ។
យោងតាមប្រភពព័ត៌មានពីប្រជាពលរដ្ឋបានឲ្យដឹងថា កាលពីវេលាម៉ោង១រសៀល ថ្ងៃទី២២ ខែមករា ឆ្នាំ២០២០ ម្សិលមិញ គេឃើញបុរសម្នាក់ កាន់យួរកំប៉ុងស្រាបៀរ ដើរចូលចំណុចកើតហេតុ មួយសន្ទុះក្រោយមក គេឃើញបុរសរូបនោះបានដេីរចេញវិញដោយខ្លួនទទេ ហើយកន្លែងនោះ ក៏មានភ្លើងឆេះស្មៅនិងព្រៃ តែគ្មានអ្នកចាប់អារម្មណ៍ គិតថា ក្រែងមានអ្នកជម្រះស្មៅ សម្អាត ថ្នូរចិន លុះដល់វេលាម៉ោង៧ព្រឹក ថ្ងៃទី២៣ ខែមករា ឆ្នាំ២០២០នេះ ក៏មានពលរដ្ឋ ដើរដាក់មងទាក់សត្វ ដើរកាត់កន្លែងកើតហេតុក៏ប្រទះឃើញ សាកសពមនុស្ស ភ្លើងឆេះរោលខ្លោច ក៏មានការភ្ញាក់ផ្អើលនិងបានប្រាប់អ្នកភូមិ ឲ្យរាយការណ៍ទៅសមត្ថកិច្ច ចុះទៅពិនិត្យមើល ។
ជុំវិញករណីខាងលើនេះសមត្ថកិច្ចនៅមិនទាន់សន្និដ្ឋានអោយច្បាស់នៅឡើយទេ ។ គ្រាន់តែដឹងថា នៅក្បែរសាកសព មានឃើញសំបកកំប៉ុងស្រាបៀរ ស្បែកជើង រីឯសាកសពវិញ ភ្លើងឆេះខ្លោចរោល មើលលែងស្គាល់មុខទៅហើយ ។
ក្រោយទទួលព័ត៌មានពីពលរដ្ឋថាបានប្រទះឃើញសាកសព ត្រូវគេដុត កម្លាំងសមត្ថកិច្ច មូលដ្ឋាន ចុះទៅពិនិត្យផ្ទាល់ដល់ទីតាំងកើតហេតុ និងទំនាក់ទំនងសមត្ថកិច្ចជំនាញចុះទៅធ្វើកោសល្យវិច្ឆយ និងបានសន្និដ្ឋាន(បឋម)សង្ស័យជាករណីឃាតកម្ម សម្លាប់ហើយ ដុតសពបំផ្លាញភស្តុតាងតែទោះជាយ៉ាងណាសមត្ថកិច្ចជំនាញកំពុងធ្វើការស្រាវជ្រាវបន្ត៕
