បុគ្គលិក KTVហ្វាងថាងល៊ំាងហ្វាន់ស័រប្រុសស្រី២៤នាក់ពុលមី
ស្វាយរៀង៖ បុគ្គលិកដែលបំរើការងារនៅKTV ហ្វាងថាងល៊ំាងហ្វាន់លៀនស័រ ប្រុសស្រីជាច្រើននាក់ក្នុងនោះមានជនជាតិចិន៤នាក់បានពុលមីប្រកាច់ក្អួតចង្អោ វិលមុខ ត្រូវបានបញ្ជូនទៅសង្គ្រោះនៅក្លីនិកឯកជននៅក្រុងបាវិត ៖ ហេតុការណ៍ភ្ញាក់ផ្អើល ករណីពុលមីនេះបានកើតឡើងកាលពីវេលាម៉ោង០១និង៣០នាទីរំលងអាធ្រាត្រចូលថ្ងៃទី៧ខែតុលាឆ្នាំ២០១៩ នៅចំណុចខារ៉ាអូខេ ហ្វាងថាងល៊ំាងហ្វាន់លៀនស័រ ភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។
បើតាមការឲ្យដឹងពីបុគ្គលិកម្នាក់ឈ្មោះ ម៉ន សាកាន ភេទស្រី អាយុ៤៨ឆ្នាំបានបញ្ជាក់ថានៅមុនពេលកើតហេតុការណ៍ មានបុគ្គលិកនៅក្នុងខារ៉ាអូខេខាងលើបាននាំគ្នាហូបមីលាយជាមួយស្បៃ ក្រោយពីហូបរួច បានប្រមាណជាង១ម៉ោងបានធ្វើទុក ក្អួតចង្អោ វិលមុខ ថប់ដង្ហើម ដោយឃើញអាការៈបុគ្គលិកមិនស្រួលខ្លួនបែបនេះ មេការខារ៉ាអូខេក៏បញ្ជូនទៅសង្គ្រោះបន្ទាន់នៅក្លីនិក ឯកជនមួយកន្លែងនៅក្រុងបាវិតតែម្តង។
ប្រភពបានបន្តទៀតថា រហូតមកដល់វេលាម៉ោង២រសៀលថ្ងៃទី៧ខែតុលាឆ្នាំ២០១៩បុគ្គលិកចំនួន១៤នាក់បានចេញពីក្លីនិកនៅសល់តែ១០នាក់ទៀតតែប៉ុណ្ណោះដែលមិនទាន់បានធូរស្បើយបន្តនៅសម្រាកព្យាបាលបន្តទៀត។
ទោះបីយ៉ាងណាលោកវេជ្ជបណ្ឌិតកែ រដ្ឋាប្រធានមន្ទីរសុខាភិបាលខេត្តស្វាយរៀងបានឲ្យដឹងថាលោកមិនទាន់ទទួលបានព័ត៌មាននេះទេ ដោយសារតែមន្ត្រីរបស់លោកមិនទាន់បានរាយការមកមន្ទីរ។
ពាក់ពន្ធ័និងករណីនេះភ្នាក់ងារយើងមិនអាចរកការបំភ្លឺពីថៅកែខារ៉ាអូខេជនជាតិចិន បានទេនៅរសៀលថ្ងៃទី៧ខែតុលា ថាតើករណីបណ្តាលមកពីអ្វីឲ្យពិតប្រាកដ ។ ចំណែកលោកគ្រូពេទ្យម្នាក់ដែលសុំមិនបញ្ចេញឈ្មោះ បានឲ្យដឹងថាករណីបុគ្គលិកខារ៉ាអូខេដែលមកសម្រាកនៅក្លីនិកនេះបណ្តាលមកពីពុលអាហារ និងខ្វះអនាម័យ៕
