អាណិតណាស់! តារាកំប្លែងនាយស្មាញ ត្រូវរថយន្តធំបុកស្លាប់ ឯប្រពន្ធរបួសធ្ងន់
ភ្នំពេញ៖ តារាកំប្លែងល្បីឈ្មោះ នាយ ស្មាញត្រូវរថយន្តធន់ធំបើកបុកពីក្រោយស្លាប់យ៉ាងអាណោចអធម៌ ចំណែកប្រពន្ធរបួសធ្ងន់
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង០៤និង៣០នាទីល្ងាចថ្ងៃទី២៨ខែធ្នូឆ្នាំ២០១៩ នៅត្រង់ចំណុចផ្លូវ៦០ម៉ែត្រកែងផ្លូវ៣០ម៉ែត្រ ភូមិទួលរការ សង្កាត់ ចាក់អង្រែក្រោម ខណ្ឌមានជ័យ រាជធានីភ្នំពេញ ។
ជនរងគ្រោះដែល( ស្លាប់ ) មានឈ្មោះ សុួន សុខហុីម ហៅ នាយស្មាញ ភេទប្រុស អាយុ ៦៨ ឆ្នាំ ស្នាក់នៅភូមិ ព្រែកហូរ ឃុំព្រែកហូរ ក្រុងតាខ្មៅ ខេត្តកណ្តាល ។
-ចំណែកអ្នកបើករថយន្តបង្ក សមត្ថកិច្ចឃាត់ខ្លួនឈ្មោះ ទិត ទី ភេទប្រុស អាយុ២៣ ឆ្នាំ មុខរបរ បើកបរ ស្នាក់នៅ ភមិ ស្លែង ឃុំជីបាល ស្រុកស្រីសន្ធរ ខេត្តកំពង់ចាម ។
យោងតាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុគេឃើញ បុរសរងគ្រោះ ជិះម៉ូតូមួយគ្រឿងម៉ាក ហុងដា ឌ្រីមC125 ពណ៌ខ្មៅពាក់ស្លាកលេខកំពង់ស្ពឺ1D-6970 ឌុមស្ត្រីម្នាក់ពីក្រោយធ្វើដំណើរតាមបណ្ដោយផ្លូវ៦០ម៉ែត្រទិសដៅពី ត្បូងទៅជើង លុះ មកដល់ចំណុចកើតហេតុ ស្រាប់តែមានរថយន្តធន់ធំ ម៉ាក ហុីយ៉ាន់ដាយ ពណ៌ទឹកប្រាក់ស្លាកលេខភ្នំពេញ 3E-7789 បើកបរដោយបុរសម្នាក់ក្នុងល្បឿនយ៉ាងលឿនមកពីក្រោយរួចបត់ស្ដាំមិនបានប្រុងប្រយត្ន័ក៏ជ្រុលទៅបុកម៉ូតូពីក្រោយនិងបុរសរងគ្រោះស្លាប់ភ្លាមៗនៅនិងកន្លែង រីឯស្ត្រីរួមដំណើររងរបួសធ្ងន់ ។ បន្ទាប់ពីបង្កហេតុត្រូវបានសមត្ថកិច្ចឃាត់ខ្លួន ។
ក្រោយពេលកើតហេតុសមត្ថកិច្ច មូលដ្ឋាននិងសមត្ថកិច្ច ជំនាញចុះមកធ្វើការវាសវែងយករថយន្តបង្កនិងម៉ូតូព្រមទាំងអ្នកបើកបរទៅការិយាល័យចរាចរណ៍ផ្លូវគោក រាជធានីភ្នំពេញ ដើម្បីកសាងសំណុំរឿងចាត់ការបន្តតាមច្បាប់ ៕
